當年今日
關於我們

【后冠、權杖值千萬】得5個名額去韓國 何麗全:獎金獎品會再加碼

蘋果日報 2018/09/06 17:32

何麗全亞姐曾志偉韓國

亞洲電視行政總裁何麗全今日喺大埔亞視總台,為亞姐2018香港區決賽記者招待會主持揭幕,佢又同10位入圍佳麗一齊見傳媒。
何麗全受訪時表示今年係亞姐30周年,所以會係佢哋最大嘅一個project,會盡力做,但講唔出呢個騷有幾多budget,佢話:「未計,仲有好多贊助商,總之12月決賽會喺馬六甲舉行,獎金獎品會再加碼。」同時又宣佈后冠同權杖會超過1,000萬,呢個數被指多過港姐,何麗全就好謙話:「唔好可以咁比較嘅,因為又係香港區、大中華區同總決賽。」
之前何麗全放風,想搵曾志偉幫手主持,志偉之後喺活動都承認,大台冇搵佢做司儀,結果喺港姐舞台真係冇佢身影,而何麗全今日再被問到志偉答應未?佢話:「傾咗兩句,你幫我問下佢做唔做啦,我哋虛位以待。」之後何麗全就轉話題,主動講外景:「我哋9月2號去佛山,進行3日2夜訓練,今次10位佳麗會選三甲出嚟。」
得10位入圍,問到何麗全滿唔滿意參賽者嘅質素?佢話:「今次安排有少少唔同,呢班女仔訓練咗幾日,佢哋有充分準備先見傳媒。」至於部份女仔選過港姐,佢就讚:「有經驗嘅就仲好,就好似歌星咁會參加唔同賽制。」但講到有啲入圍者疑似整容?何麗全就解釋:「我唔知喎,我哋賽制冇呢樣嘢,最緊要佢哋對自己有信心。」
不過之前宣傳時何麗全講過,入圍佳麗可以去韓國受訓,今日活動新聞稿就改咗口風,話香港區決賽嘅三甲、最上鏡小姐同IG人氣得主,先可以去韓國接受度身訂造嘅培訓。
精選娛聞,喺晒《娛果》
http://fb.com/appledailyent
empty
提到曾志偉會唔會做亞姐司儀,何麗全就話「虛位以待」
empty
亞姐2018香港區決賽記者招待會今日喺大埔亞視總台舉行