好多老細當佢哋「發咗」嗰陣，永遠都以為自己係神，暗地𥚃吹噓自己有幾成功，只得小部份老細係「真‧謙虛」。當然有部份老細真係有實力，不過唔係全部。但有啲老細從來冇諗過自己所謂嘅「成功」，並唔係因為佢哋好叻，而係佢哋好似劉備咁，好彩地搵到班好同事同佢打工，同時又遇到一班好客戶，先有今日嘅江山。

好耐之前認識一位老細，初時覺得佢真係好成功，每年嘅生意都越做越有，之後見佢換車換樓，賺個滿堂紅，但賺錢背後，有著好多鮮為人知嘅故事。

近乎所有幫佢打工嘅員工，冇一個人係鍾意佢，可以講係憎佢，就連同佢出生入死多年嘅兄弟都抱有極大怨氣，原因除咗係佢對人態度好差之外，喺工作上對同事亦勁刻薄。呢位老細覺得一星期 OT 五日係正常，每晚九點前放工係「早走」；又覺得自己今日嘅江山，全因自己一雙「神之手」，所以佢每一次同同事對話時，都以神一樣嘅氣焰去呼喝別人，「尊重」二字根本冇出現過喺佢本字典內。所以最後，佢雖然贏得無數嘅金錢，但永遠都贏唔到人心。而家佢身邊有好多阿諛奉承嘅人，但都只係覬覦佢嘅地位同權力，而唔係真心敬重佢。

喺好多有錢人嘅世界𥚃，會以一個人擁有幾多錢、識幾多人、有幾多人識佢，來衡量一個人嘅素質，但呢類人充其量只係一個有錢佬，而唔係成功人士。人可以分高矮，但唔應該分高低，就算真係要分素質嘅高低，都唔在於佢有幾多錢、職位有幾高，反而係睇佢如何對待地位比自己低嘅人、比自己弱小嘅人。如果上咗神枱都仲懂得尊重上／中／下階層嘅人，先係真正嘅成功人士，因為佢哋銀包有錢之餘，心中亦富有。

要做一個有錢人，更要做一個成功嘅人。

專欄作者簡介：
我做Marketing
由Michael及Derek兩位marketer創立的媽劇停平台。撰寫市場及職場文章。著有《我做媽劇停》及《暖男之道》。

Facebook專頁：
https://www.facebook.com/iDoMarketingHK/

發掘更多身邊的小城故事，請LIKE 蘋地 Facebook Page，並設定為「搶先看」： https://www.fb.com/appledailyland