在中建數碼（1169）成功批股執幾億嘅消息帶動下，中建電訊（138）噚日升8.3%，收2.60元，成交有成3500萬元。經紀陳話，證明背後炒家有錢，睇個款中建電訊同埋中建數碼將會輪流炒。
經紀陳嘅理論好簡單，中建數碼炒海爾借殼注資概念，況且市場知佢上次批股，唔係太多貨散到出街，所以繼續炒高唔出奇。
中建數碼股價抽高，有利阿媽中建電訊，加上中建電訊剛供完股，幕後炒家囤積唔少貨，亦要借機炒上散貨。
另外，小初過年前曾提過，話有人向朋友仔ABC推介德智發展（070），隻股噚日突然發力抽上，升咗27%，收10.8仙，終於脫離仙股一族。

德智見好要收
ABC有錢賺好開心，而且佢個經紀同佢講，德智股價重會炒高多一轉。但小初就勸佢見好就收，咪太貪心，皆因升得急時跌得亦急。