【C1頭條】Moka妝前清純Look 陪鬚根城城行名店
方媛狗仔出更素顏郭富城中環置地廣場
郭富城(城城)真係越來越貼地,早前佢被發現放低天王身段,陪嫩模太太方媛(Moka)返外家蕪湖設宴招待親朋好友,仲同大家舉杯暢飲(新聞連結: https://bit.ly/2Ck5a6A ),之後再陪太太行超市。
貴為天王嘅城城日前為囡囡Chantelle假迪士尼慶祝1歲生日,本報收到消息指城城當日同好友分享話「雙喜臨門」(新聞連結: https://bit.ly/2LWvjb2 )!城城經理人小美噚晚回覆《蘋果》謂:「我現階段就未收到呢方面喜訊,不過如果係真嘅,亦都肯定係開心事。我當然希望聽到好消息,亦都希望大家俾多啲祝福城城。」
而喺日前某個傍晚約7點,城城同太太Moka就暫時撇甩囡囡Chantelle,拍拖到中環置地廣場行名店購物。兩夫婦衣著打扮隨意,同樣穿上恤衫及牛仔褲,Moka更素顏現身,雖然眼睛比化濃妝時細咗,但勝在皮膚夠白,束起馬尾依然好有少女味。而城城就唔戴口罩,索性以真面目示人,不過城城最近為新戲留到滿臉鬍鬚,離遠都好難發現天王駕到。
城城同Moka完街準備落扶手電梯,沿途亦有傾有講,當發現記者後,城城先急步行上早在商場門外等候嘅七人車,Moka則緊隨其後。
精選娛聞,喺晒《娛果》
http://fb.com/appledailyent
城嫂唔化妝對眼雖然細咗,但仍好有少女味。(攝影﹕朱志聰 /互網網圖片)
城城同Moka初初結婚時都好避忌,會戴晒黑超同口罩行街。(資料圖片)
上月陪太太返外家擺酒,仲一齊行超市。(互聯網圖片)