當年今日

小野伸二唔出得
假日球驗客手記:飛燕諾爭歐冠勢危

蘋果日報 2003/05/25 08:00


荷甲將會進入最後兩周,榜首爭標三雄恩浩雲、阿積士同飛燕諾,今日都會分途出戰,但係排第三位嘅飛燕諾想趕過其餘兩隊,真係好難。
飛燕諾今日就會作客威廉二世,射手雲荷當無疑狀態大勇,之不過日本中場小野伸二上個禮拜大戰恩浩雲時,同尹邦美相撞後左小腿受傷,雖然日前已經再次練波,但應該趕唔切復出,預計禮拜四對洛達煞科戰先至會上陣;對今場一定要贏先重有機會問鼎聯賽錦標嘅飛燕諾嚟講幾不利,甚至想爭番個第二,參加下屆歐冠盃都有一定難度。
其實,荷蘭波一直都有唔少波友支持,好似三強作客賽事,梳打埠其實可以開盤,尤其威廉二世曾經主場打和恩浩雲,實力唔算太差,未必冇得打;連北歐波都開,呢類大戰,冇理由唔畀波友多個選擇喎!

巫師施法幫碧咸康復
碧咸友賽南非時右手拇指骨裂,要休養約六至八個禮拜,鏟跌佢嗰位莫費利對唔住之餘重話請位傳統祖魯族巫師,用樹葉及樹皮加巫術,希望幫碧咸提早康復。我求大俠對非洲巫術抱懷疑態度,如果真係掂,到時有機會去南非踢世界盃嘅球隊咪唔使旨意攞冠軍?

比堤遭車仔放棄真坎坷
比堤曾經都係我求大俠幾欣賞嘅球員,但自從呢件法國中場離開阿仙奴後,事業發展一落千丈,幾坎坷。聽講準備閂水喉嘅車路士無意再收留呢位高薪球員,睇怕佢會變成「人球」。最慘係比堤已經三十三歲,又成日受傷,真係擔心堂堂法國國腳搵唔到好歸宿。
馬刺歎慢板得分開下盤
NBA西岸季後賽因雙方火力威猛,通常總得分都係開上盤,但噚日馬刺贏小馬嗰場波,開盤係二百一十點五分,結果只得一百七十九分,差成三十幾分;雖然話奴域斯基傷出對搶分有影響,但最重要係馬刺拖慢節奏嘅戰術奏效,令雙方得分大幅下調,所以波友要識變通呀!

湯贊奴域借啲意走頭
早前患膀胱癌嘅NBA火箭隊教練湯贊奴域,噚日以自己嘅健康為理由決定辭職,但據聞教咗火箭十二年嘅佢已經連續四季帶唔到球隊入季後賽,班主早有怨言,可能佢睇到勢色唔對,咁就借啲意好嚟好去都唔奇。

真路比利「殺傷力」強
馬刺嘅真路比利好波就係人都知,不過佢重有招必殺技,就係𡁻低敵方球隊嘅主將。好似喺準決賽對湖人,佐治之所以傷出就係因為俾佢偷波嘅時候搞到拗柴。今次對住小馬,奴域斯基第三場受傷又係因為真奴比利撞落佢膝頭所致。雖然我求大俠信佢唔係專登,不過對住馬刺嘅球隊,就真係要小心佢喇。