踏入馬年，第一日就真係有血光之災。港股紅盤低收，跌到阿媽都唔認得。雖然係咁，新股上市仍然馬不停蹄。其中一隻，就係啱啱喺年初八即係人日後一日上市，又係非常有感覺嗰種配售形式上市、上市過程又何其低調嘅創業板新股圓美光電（8311）。
圖美光電係本地公司，主要從事手機顯示組件貿易，包括講咗你都唔太明嘅TFT-LCD面板及驅動器集成電路、偏光板等等。除咗貿易，圓美亦從事TFT-LCD面板加工。產品交畀TFT-LCD模組製造商完成組裝後再交由手機製造商組裝成為手機。

Prof J睇咗招股書，話圓美喺全國手機TFT-LCD面板及驅動器集成電路呢個板塊穩佔第四大貿易商地位，市場佔有率11%，而在相關消費市場過去五年嘅複合增長都有超過10%。
上市集資所得，主要用嚟搞或者收購面板加工廠房，自營薄化及切割工序，有關戰略應該係希望提升毛利空間同提升付運效率，即係慳到錢同錢轉快咗！對改善競爭力有明顯幫助。其他用途包括擴大銷售及支援團隊、豐富產品組合等。2013年頭八個月純利都有5,500萬大洋，講真佢都夠籌喺主板上場啦，但係竟然又喺創仔板上市，呢個時候，Prof J有兩個奇想：（一）「先創後主」，為日後嘅舞台打好一個靚仔嘅基調。（二）一係就似我偶像星仔話齋，「低調得嚟受萬人敬仰，跟住就唔聲唔聲就嚇你一驚咁話」！諗諗吓，呢種逆向思維，作為股市飛貓嘅我即刻眼都大晒！
睇吓飛貓今次可唔可以幫大家喺馬年雙馬以外搵多一隻好「馬」先。繼續追蹤，出發！

徐燦傑
中國銀河國際財富管理主管
本欄逢周三刊出