當年今日

博殺三年名利雙收 05新目標
Twins渴望好好談戀愛

蘋果日報 2005/01/16 00:00


Twins兩位成員蔡卓妍(阿Sa)和鍾欣桐(阿嬌)入行三年多以來,名利雙收但緋聞不絕,近期就盛傳阿Sa與鄭中基因合作拍片而撻着,二人曾秘密拍拖。阿Sa承認拍戲確易令人fallinlove,而她與阿嬌更講到出口渴望拍拖,寄望今年有新戀情。
愛情篇靜待緣份降臨
組合Twins兩位成員蔡卓妍和鍾欣桐身為人氣偶像,獲萬千fans支持,二人年輕貌美又活潑,難怪緋聞不絕於耳。正如近期阿Sa就十分搶手,先後與謝霆鋒和鄭中基傳出緋聞,而阿Sa和阿嬌早前在尖沙嘴接受本報訪問時,更異口同聲表示正在等候緣份降臨。

傳秘密拍拖三個月
阿Sa坦言現階段對拍拖確有點心癢癢,她笑說:「但冇辦法啦,緣份嘅嘢,我太耐冇接觸過呢樣嘢(拍拖),感覺好似唔記得,唔知拍拖係乜嘢滋味。我嘅心情好矛盾,其實𠵱家唔需要拍拖,但有時見啲朋友拍拖咁開心,有時我又會有少少時間『漏』咗出嚟,就諗自己係咪應該搵番個人呢?」
近期盛傳阿Sa與鄭中基在拍攝電影《追擊八月十五》後擦出愛火花,二人曾秘密拍拖三個月,問阿Sa與鄭中基會否戲假情真?她即嘻嘻笑說:「一收工已經唔記得拍乜,有時一日拍兩套戲,做吓呢個角色,又做吓第二樣角色,我唔記得㗎。」

擔心緋聞愈描愈黑
又問阿Sa與鄭中基或謝霆鋒有否發展機會?她笑說:「難啲啦,我同佢兩個都熟,dayone大家都唔係嗰樣(觸電),拍戲日日對住,係容易fallinlove,但拍完成套戲,你就知唔係嗰樣。其實以後我都唔想再講太多緋聞啦,愈講得多就愈寫得多,愈亂就愈諗得多,一唔係就嚇走啲人,搵鬼要我咯!舊年又冇啦!食白果,展望今年啦!」
既然阿Sa擔心緋聞愈描愈黑,那她會否因而有所避忌,拒跟鄭中基或霆鋒約會?阿Sa稱:「唔會唔見面,一個人點可能冇朋友呢?唔傳佢咪又傳第二個!但我好潔身自愛㗎!」
至於阿嬌過往亦曾一度成為緋聞女王,分別與陳冠希、余文樂、方力申和房祖名傳過拍拖,談到現在的心情,阿嬌坦承希望好好戀愛,她說:「都有諗吓嘅,日日做嘢咁辛苦,都想有人錫吓我,公司畀拍拖㗎,但幾難搵到個好對象。」
empty
Twins
empty
阿Sa性格開朗活潑,難怪大受男生歡迎。
empty
快將二十五歲的阿嬌盼望得到男友疼錫,惜苦無對象。
empty
近期有傳阿Sa和鄭中基曾秘密拍拖。
empty
阿嬌(左)與成龍愛子房祖名曾傳緋聞。