由宋仲基、蘇志燮、黃政民、李貞賢等人主演嘅韓片《軍艦島》，將於下月喺韓國上映，香港亦定檔於8月上映。為谷新片，電影方面今日再次公開一眾主演嘅新海報，當中飾演獨立軍人嘅宋仲基手拎槍，眼神堅定地望實前方。

而宋仲基早前接受韓媒訪問時，透露退伍後連續兩部作品《太陽的後裔》及《軍艦島》都係飾演軍人，因此目前講嘢時仍有軍人生硬嘅語氣。

提到宋仲基9月19日生日，佢表示：「通常唔會舉辦派對，對於吵吵鬧鬧嘅生日派對有啲負擔感，都係跟比較親密嘅朋友食餐飯。」提到圈中好友趙寅成、李光洙等人，宋仲基笑言：「好多人都知道我嘅朋友，唔需要特別說明，大家都知道佢哋係好好嘅人。而大眾唔知道嘅好友，就冇必要一定話畀大家知有咩人啦。」

宋仲基亦不忘宣傳新片《軍艦島》：「新上映嘅電影《軍艦島》若得到好多人嘅喜愛，就係我最大嘅（生日）禮物。」

另外，宋仲基透露最想跟薛景求前輩合作，亦想再次跟李璟榮前輩合作。