當年今日
關於我們

孤寡老弱斷炊絕境見曙光

蘋果日報 2002/02/17 00:00


吳連彩喪夫後要獨自背負照顧四名年幼子女的重責。九旬老嫗李婆婆老來被兒子奪去棺材本還賭債幾陷斷炊絕境,兩人在孤單無助之際,幸獲善長援手,令暗淡的人生露出曙光。
個案一 :「大女同二女嘅成績差咗好多,尤其係大女,佢以前考第十名,但今次考試連英文都唔及格,大女好錫佢爸爸,𠵱家上香畀佢爸爸嘅時候,佢有時都會忍唔住喊。」三十七歲的新寡吳連彩歎道。
阿彩任職地盤的四十一歲丈夫黃玉欽,去年十二月在工作期間慘遭鐵柱擊斃,家庭支柱猝然倒下,阿彩與四名年齡由十一個月至十歲的子女,頓覺前路茫茫。

「幾仔乸唔知點算」
阿彩喪夫後孤寡失依的苦況早前報道後,蘋果日報慈善基金接獲讀者捐款合共四萬零七百六十元,日前已交阿彩簽收。「𠵱家每個月開支都要一萬蚊左右,淨係細仔奶粉、尿片,同埋幾個仔女返學食飯都使唔少錢,我未申請到綜援,呢幾個月好彩得社會人士捐款,如果唔係,我哋幾仔乸都唔知點算。」抱着幼子的阿彩感激地說。 捐款編號:C0396
「夠用到百年歸老」
個案二 :兩年來一直獨自租住牀位的李婆婆,在春節前夕,終決定搬回家裏與兒媳同住。「一來被人迫遷,搵唔到地方落腳,二來自己年紀真係太大,唔行得,唔走得,唔靠個仔靠邊個吖。」
已屆九十六歲高齡的李婆婆,育有兩子,因長子已年逾六十,自顧不暇,多年來一直由任職雜貨店的次子照顧,惜染有不良嗜好,連李婆婆僅有的數萬元積蓄亦被取去還賭債,令她傷心欲絕,被迫離家租住牀位,卻因身無長物,過着吃不飽、穿不暖的悲淒日子。
日前,記者帶同合共三萬七千一百八十元的讀者捐款再訪李婆婆,只見回家後的她心情明顯較從前開朗。「𠵱家佢兩公婆對我都冇乜嘢,新抱見我行動唔方便,都會幫我沖涼,閒時又會煲啖湯畀我,老實講,兩仔乸邊有隔夜仇,我只希望大家住得開心。」
對於社會人士的關懷,李婆婆由衷感激,並謂會善用這筆善款作為生活費。「𠵱家我都冇生活費,好彩有你哋呢筆錢,慳慳哋都夠用到我百年歸老囉,多謝晒。」捐款編號:C0410

暖流熱線
電話:29908688
傳真:23702192
電郵:[email protected]
網址: http://www.charity.atnext.com