早兩日八方打開《蘋果》，見到個全版廣告，成棚人圍住本《壹本便利》，大大隻字寫住話「請沒有罪的人砸第一塊石頭」，正𢱑晒頭之際，跟手一揭，嘩！嚇得我吖！見到堂堂姓肥名佬黎先生俾人抦到豬頭咁，頭破血流口腫眼腫，仲有塊蕉皮搭喺膊頭㖭，個樣楚楚可憐鬼咁淒涼，都唔知搞乜鬼。噚日再嚟一個廣告開估，原來係《壹本便利》改名《FACE》，實行洗心換面大改革咁話。
見到個廣告，除咗八方嚇一跳，街坊讀者都議論紛紛，究竟佢個豬頭爆缸look係電腦執上去？定係荷李活特技化妝？更有滋事分子話睇怕肥佬黎真係俾人揼㖭，真係噏得就噏。八方查探過，原來啲傷勢係由電影特技化妝師搞出嚟嘅，仲聽聞拍攝當日，肥佬黎相當賣力，七情上面拍得住朝偉，為拍得最悲慘一shot，不惜放下身段試盡各款甫士，仲建議將塊蕉皮放上頭頂，不過最終因為效果過份滑稽而放棄。