賴：賴維銘
記：記者吳文輝

記：群眾力量真係唔可以睇小，你喺「最受歡迎騎師選舉」得票率暫排第二位有17.9%，雖然落後潘頓嘅44.8%一段距離，但起碼連雷神（17.7%）都唔夠你揮，你會唔會感到有啲意外？

賴：除咗驚喜，直情係感動啦！亦希望藉住《蘋果》多謝各位馬迷朋友支持。之前已經有朋友問我，如果咁好彩贏到「最受歡迎騎師」，會唔會返去領獎？
我嘅答案係一定唔會！因為除咗已掛靴呢個因素，我今季成績絕對唔算好，呢個獎真係受之有愧！有大家支持我已經感到心滿意足。
如果畀我揀，我一定選何澤堯，因為呢位師弟確實非常努力，今季成績亦有目共睹，值得以呢個獎作為表揚。

記：講番今次（16日）賽事，其實何澤堯都有唔少賽力座騎，例如第八場三班草地1200米嘅「勝利威龍」，上仗在港初出已經跑第二，機會應該唔錯。

賴：「勝利威龍」上場沿途都算順風順水，無受太大考驗，結果輸三個馬位予「日日精彩」跑第二，本來唔算特別出色，不過佢跑贏第三名的「牛角仔」，而且時間非常好，以在港初出嚟講算十分唔錯。
「勝利威龍」唔算大隻，三歲北半球馬仍有唔少成長和進步空間，預計步速正常，希望何澤堯把握有呢匹好馬在手，順利贏番場。

記：你另一位師弟黃皓楠，今次會騎第四場四班1600米你熟悉嘅「贏馬神器」出賽，有三磅減會唔會好啲？

賴：「贏馬神器」係一匹唔難騎嘅馬，當然用潘頓、莫雷拉係好，不過用華將減磅亦係好方法，本身四班負123磅有優勢，檔位好，如果可以主動點，有望跑入前列。

-----------------------------
6月14日至22日 《GAME迷鬥一餐》
玩《小小金魚跳躍王》即有機會贏取 OUTBACK $100現金券
http://bit.ly/2HW1FUH
-----------------------------
【新聞有價】6月17日起 繼續撐蘋果
請往蘋果日報網站了解更多