「鹹蛋超人」舞台劇今晚喺亞洲博覽館首演，捧場嘉賓包括諸葛紫岐（Marie）旗下三位女藝人黎美言（Winkie）﹑莊端兒及黃倩婷﹑周嘉莉﹑陳嘉桓﹑李國祥等，而「超人之母」羅子喬則於香港演出十場。

Winkie及黃倩婷均性感現身，Winkie露腰﹑黃倩婷就着黑色連身裙，谷晒胸，相反日前行性感泳衣騷嘅莊端兒，今晚就收起性感，僅露香肩。

問到莊端兒點解打扮密實咗？佢話：「驚自己擺得太多出嚟，令人睇到厭。」黃倩婷就話自己唔係咁識着衫：「件衫係Marie幫我揀。」Winkie都話件衫係Marie幫佢揀，佢話：「嚟到新公司第一次出Function，同埋認識咗好姊妹，好期待，所以今日着靚啲慶祝。」

咁係咪會行性感路線？Winkie表示：「可以呀，如果靚的話都OK呀，不過着呢啲靚衫，自己努力keepfit，我好易肥，會同佢哋交流減肥心得。」有指黃倩婷係諸葛紫岐契妹？佢就話：「冇同佢正式上契，因為佢好忙，但佢好識照顧人，我冇家姐哥哥，得一個妹，所以被照顧都好開心，平時襯衫都問對方。」

黃倩婷被問到簽新公司後，係咪會以全新形象走性感？佢話：「少少性感啦，會睇場合。」Winkie及莊端兒得悉佢係Marie契妹，則笑言要爭住要Marie契妹。問到想唔想似Marie嫁個有錢人？Winkie及莊端兒表示：「最好啦﹗順其自然。」

莊端兒男友張致恆（Steven）日前表示，會儲三年錢然後娶莊端兒，莊端兒冧爆表示：「我會等佢0架，佢會愈來愈有錢。」另外，三女異口同聲表示鍾意超人迪加。