日本女星高島禮子嘅前演員丈夫高知東生，上月喺酒店爆房吸毒被捕，同場拘捕任職歡場嘅情婦五十川敦子，當時兩人赤條條喺床上，更向警方承認吸毒，醜聞令高島禮子大受打擊。

高知東生於前日獲准保釋外出，據知保釋金達500萬日圓（即約37.5萬港元），高知步出灣岸警署時向在場傳媒躹躬7秒道歉，含淚話好想快啲見老婆，不過高島禮子嘅發言人噚日都仲話冇計劃會見高知。

盛傳高島禮子已決定離婚，日前有報道指男方將已簽名嘅離婚申請表寄俾老婆，而忙於趕拍新劇《女人們的特搜最前線》嘅高島禮子，噚日就從京都搭鐵路返抵東京，佢喺橫濱站見到記者時神色凝重，對記者提問一概冇回答，反觀高知在保釋後未有返回寓所，估計二人會喺本周內解決離婚問題。