西環發炮：不允許香港再亂起來。認真的，諸公初來埗到，一聲令下，離地到痹。「平亂」的步驟措施，靠嚇呢招，已經用到蝕，不如軟攻。最煞食一招，是派錢。注意，是西環派不是港府。歷史性「開倉」派萬一蚊，多過特區政府，每個市民都有份，咁就知道，到底邊個先係真腦細！開倉還預告有第二第三波，等你安心懲罰性消費！派錢更特別關愛少年人，十二歲或以上（買粉彩不成慘被差佬撞飛騎壓的小妹妹被關注）已可領款。西環做嘢，唔使你教，拎錢必須參與國家隊撩喉，資料感恩送中！要錢定要私隱？手足爭論，鬧晒大交，媽我好亂啊。擲錢的分化效用大過射胡椒彈。

接下來放風，指習帝想換人做做看。鄭市長制裁之身冇say，估領袖遊戲開波。排第一的疑似候選是唱好明日大嶼的劉德華，鄭市長交波畀佢，哽咽自己犧牲極大，但為了國家，犧牲微不足道。另一位劉公子也被提名，由鹿八九撐，唔係陪跑。西環順應民意搵多個花旦入圍，屙夜尿撞崩頭那位獲欽點上榜，後勁凌厲。全城有銀用，有花生食，兩辦紅過觀音菩薩。特區勝在有西環。