王祖藍同李亞男嘅B女Gabrielle上月出世，之前兩人曾公開B女嘅超聲波相，嗰陣睇輪廓就似老竇多啲，祖藍亦話B女個鼻同個嘴同自己最似，搞到一眾網友紛紛留言話似媽咪靚啲，祝福B女出生後個樣最緊要似李亞男。前晚，李亞男終於喺社交網出post晒一家三口合照，睇番B女嘅正面，樣貌幾精緻喎！

網友激讚

去年冬至（12月22日），王祖藍同李亞男嘅愛情結晶品出世，王祖藍喺社交網站上載一家三口拖手相，之後有網友質疑係咪因為B女似祖藍唔夠靚，所以得手仔相。前晚謎底終於揭開，事關李亞男上載咗佢同老公抱住阿女嘅啜爆相，仲留言：「我現在有兩個寶寶，生日快樂，我親愛的大BB老公，你喜歡今年的生日禮物嗎？」原來前日係祖藍39歲生日，睇祖藍啜爆囡囡嘅肉緊表情，就知佢係二十四孝老竇，有女萬事足。

亞男post完呢張相後，祖藍亦喺自己微博轉發個post回覆話：「你和Gabrielle都是我最好的禮物。」睇番Gabrielle嘅真面目，其實仲未見到似媽咪定爹哋，但個樣幾精緻，並唔係祖藍口中嘅「個樣太似我」，睇落冇遺傳到爸爸「鼻大厚唇」嘅基因。其實王祖藍自己都想個女似老婆，B女未出世前佢都曾經勁忐忑。B女真面目曝光後，網友都紛紛留言讚靚，話唔似祖藍。有口痕友仲叫祖藍千祈咪去驗DNA，否則會有驚人發現，真係抵死。

撰文：馮仁昭