【現場直播】
雨傘革命： http://umbrella.appledaily.com
YouTube: http://bit.ly/umbrellalive

相遇那天，在瑪麗醫院的骨科病房。一個是剛切去左腳的27歲體育老師；一個是22歲初出茅廬的骨科護士。現實的人生，像愛情小說劇情，「嗰時一齊，最擔心係唔知點說服阿媽，邊諗到咁浪漫。」馮莊冰英傻笑。轟烈的愛情，無花無鑽介，卻細水長流。當年的烈女，變了今天的慈母，夫唱婦隨。結伴跑馬拉松、組隊毅行，還計畫六十高齡，登珠峰去。二人三足，走過三十年，一樣甜如蜜。

記者呂麗嬋攝影羅君豪

下月14日，是樂施毅行者舉行的日子，全程100公里，莊冰英與丈夫馮錦雄，正積極備戰，城門水塘、梅子林，吐露港，總見到他倆的身影。「佢哋總係秤不離砣，見到馮生，見唔到馮太先出奇。」跑友如是說。就連馮錦雄自己，都直認不諱，「好多人問我，點解唔用行山杖？我話我手中無劍，心中有劍，不過你哋見唔到之嘛。」望著太太，他甜絲絲的說。

62歲的馮錦雄，是本港首個參加毅行者的截肢運動員，過去接受訪問，都是他在說，太太靜靜的聽。記者卻好奇，這個背後的女人，當年因何委身下嫁獨腳丈夫？「佢遇車禍，喺醫院留醫，嗰時我由內科轉去骨科，仲係新丁一名。」年輕鐵騎士，英皇道切線卻被電車拖行，體育健將從此失去左腿。一段良緣，相遇在病房，今日看，何其浪漫，但當年，卻是錯誤的時間。

「最初，邊度會諗拍拖吖。」莊說。不是小說中的才子佳人，那有一見鐘情這回事，幫忙洗傷口、安排預約物理治療，公立醫院，病人氹氹轉，只覺這個年輕男病人好堅強，失去一腿，從不苦著臉；人緣又出奇的好，每逢探病時間，來探望他的學生絡繹不絕，就連主診醫生，都成了朋友，「佢出院嗰日好巴閉，醫生專登車佢返旺角嘅屋企，同行仲有其他護士，一班人柴娃娃，喺佢屋企食埋晚飯先走。」八十年代的香港不富裕，但卻連醫院都溫暖過人。

由病人變成朋友，又由大伙人去深水灣BBQ，變為單獨約會，「有次佢約我去海洋公園影相，原來係佢生日。」單刀直入求愛，從沒戀愛經驗的莊冰英慌了手腳，愛情初哥的27歲快樂生晨，食了個大檸檬。「好在我嗰時已有毅行精神，唔會咁易放棄。」坐在一旁的馮錦雄，望著太太大笑：「咪做住朋友先囉，我冇咗隻腳，佢要考慮嘅更多，好正常。」對於自己的缺陷，馮坦蕩蕩。畢竟，要別人接受，先要接受自己。

出身基層大家庭，又身為長子，無暇自怨自艾，出院後丟了教職，就轉行做物業管理，由零開始。別人遮遮掩掩，他努力適應全新的自己，就連去泳池游水，都懶得戴上義肢，「有啲人以為無咗隻腳，落到水平衡唔到，其實戴住隻假腳，反而又重又多餘。」別的泳客看著他的斷肢，很尷尬，倒是他神態自若，久而久之，別人也就不當一回事。這種沉著，莊冰英看在眼裡，生出了好感，「覺得佢好堅毅、好難得。」大檸檬竟開出了情花，愛得轟烈。

「唔敢講俾阿媽知，以前屋企賣山貨，好傳統，阿爸早過身，阿媽一個人湊大我哋，好辛苦，我知佢一定唔贊成。」出生貧苦，管教卻嚴，晚上十時已是死線，比灰姑娘還要早回家。偏偏，言聽計從的乖乖女，卻愛上截肢男生，秘密拍拖，還達談婚論嫁，人生第一個革命，是自己的終身幸福。「嗰時拍咗拖一年幾，想結婚，叫佢嚟舖頭幫手執貨，諗住留個好印象先慢慢講。」

穿好長褲、戴上義肢，戰戰競競，只是未及刺探媽媽心事，眼利的街坊已從馮的步姿，看出端倪，「鬧到好僵，喺嗰個年代，阿媽真係一巴掌刮過嚟，無情講。」由不揪不睬到接納女兒的選擇，漫長但堅定，「希望多啲帶佢返去，等佢放心多啲，知道呢個人唔係拖累我，而係會俾到幸福我。」拍拖四年修成正果，愛行山的馮錦雄，令太太愛上運動；愛上跑步的莊冰英，又鼓勵丈夫帶隊毅行，挑戰自己。

「嗰天令我無咗隻腳，又俾番一個最好嘅太太我。」馮錦雄輕輕的說。患難中的愛情，互相扶持，二人三足，原來只要愛得夠，一樣可以走到天涯海角。