當年今日

【《藍海》集集追】終於表白! 第八集定律李敏鎬再咀全智賢

蘋果日報 2016/12/08 22:09

全智賢李敏鎬集集追第八集藍海傳說

韓國女神全智賢同「長腿Oppa」李敏鎬主演嘅SBS新劇《藍海傳說》今晚播到第八集,上回就講到全智賢飾演嘅美人魚沈清趁李敏鎬飾演嘅天才騙子許俊在唔喺屋企,就跳咗落泳池變美人魚,痛快暢泳一番,點知李敏鎬因為漏咗電話就返咗轉頭......
今集一開始就承接上一集,李敏鎬入到來見到全智賢喺池中,李敏鎬以為全智賢裸泳,即時叫佢唔好回頭,最後全智賢成功上岸,李敏鎬就鬧全智賢唔可以隨便咁樣游水,之後李敏鎬就離開等全智賢換衫,並叮囑騙子三人組成員以後返屋企要按門鐘。
全智賢約趙正錫見面,向佢傾訴差啲被李敏鎬發現自己係美人魚,趙正錫就繼續怪全智賢人生道理,又教佢點睇人說謊。李敏鎬去咗搵申惠善,仲睇到那個屬於金聃齡(李敏鎬古代身份)嘅花樽,見到花瓶上嘅人魚同男子接吻嘅圖案,覺得似層相識。
於是李敏鎬去搵教授,並接受催眠,見到古代同全智賢相識嘅片段,即時大感吃驚。李熙俊發現全智賢有一袋珍珠,全智賢聲稱係自己賺錢回來,原來全智賢不斷睇悲情片等自己狂喊才可以換成珍珠。
全智賢又再約趙正錫,趙正錫話自己因為每日都要待喺水中先唔會死,又鬧全智賢點解刪除咗李敏鎬嘅記憶後仲要嚟搵佢,全智賢就話:「我回去點生活,我想見他點算。」趙正錫傷感話點解人魚一生只能愛一個人,唔可以愛完一個又一個,全智賢聽完又喊出人魚淚。
全智賢半夜搵李敏鎬,問李敏鎬會唔會有計劃愛自己,李敏鎬絕情地拒絕咗全智賢,話自己唔會愛上人,因為人會令人失望,全智賢就話:「如果你有喜歡我嘅計劃及想法,你要告訴我。」
申惠善教全智賢點樣令李敏鎬鍾意佢,點知就被全智賢知佢講大話,而全智賢就決定用佢相反嘅方法,就係成日出現喺李敏鎬面前,係咁纏住李敏鎬。李敏鎬帶全智賢去圖書館,自己順便去查金聃齡係邊個。
睇睇吓,鏡頭就回到古代,李敏鎬喺古代同樣成日發夢見到啲奇怪影像,古代嘅全智賢身受重傷,醫師提議要將佢送回大海才是,李敏鎬將自己嘅翡翠玉鈪畀咗全智賢。
全智賢睇完人魚童話書好傷心,於是又去搵趙正錫,點知被告知趙正錫因為心臟痳痺已經死亡,全智賢仲見到趙正錫心愛嘅女人,又同對方講趙正錫從來冇後悔愛過佢,因為大家曾經有美好嘅回憶。
全智賢擔心自己會好似趙正錫咁死亡,如果兩個月時間都唔夠令李敏鎬愛上自己嘅話,全智賢就會步入死亡,所以令擔心得按住心臟。
逃犯成東日受李敏鎬後母之托要殺死李敏鎬,於是約咗李敏鎬見面,想殺死佢,兩人更大打出手,李敏鎬亦都受咗傷。雖然李敏鎬受咗傷,但都即刻飛的去漢江搵全智賢,佢以為全智賢受傷。見到全智賢即時好緊張,全智賢傷感地話:「我甚麼都不能告訴你,我有好多秘密,我要返去,喺更晚之前,我要離開這兒。」李敏鎬唔捨得全智賢,含住淚向全智賢直認自己開始有愛佢嘅想法,叫全智賢唔好走。
鏡頭又轉到古代,原來古代嘅李敏鎬同全智賢臨別前,叫佢唔好再刪除佢嘅記憶,即使記憶有幾痛苦都好,都係屬於佢本人,於是兩人就再情深咀嘴,雖然之前全智賢因為救李敏鎬已咀嘴同佢做人工呼吸,不過今晚呢一集係第八集,自然又有韓劇第八集之吻嘅定律啦。