狼振英3月當選特首之後，即刻高呼香港從此冇唐營同梁營，只有香港營；之不過咁，佢嘅大和解行動喺過去幾個月冇乜成效，挺唐人士繼續插佢，政務官場又冇人幫佢，做乜嘢都冇乜人like，當然又要出動自己友撐場。最近一個名叫「香港營」嘅組織就誕生咗，不斷喺場外為民望低落嘅狼振英做啦啦隊。
雖然名為「香港營」，但查實營內清一色梁粉，包括劉炳章、麥國華、蔡涯綿，以及傳聞本來會加入新政府做副局長，但後來又驚廚房太熱而褪呔嘅前房署助理署長藍列群。

撐謬波　撐洗腦教育

究竟係冇梁粉以外嘅人肯加入，抑或香港營根本只容得下自己友嘅聲音？八方真係唔知嘞，但係見到呢班梁粉喺今個月開始，先後喺報章撰文為狼班子做政治化妝，由力保劏房局長，到力撐洗腦教育，再到力挺新政府有希望，篇篇都睇到八方毛管戙，相信執筆者如果唔係梁粉，肯定寫唔出囉。
查實狼振英有成個政府做大公關，點解都要出動自己友幫拖？有官場中人話，當然唔係官場冇人才，但佢哋肯唔肯全情服務狼英呢？大家肯定心裏有數。八方都相信，狼振英都睇到呢一點，否則狼振英嘅心戰室，又點會幾乎只有佢同邵善波等幾個梁營中人，同以前成個特首辦都係大腦嘅情況截然不同？正所謂：疑人不用，狼振英要另組啦啦隊為自己塗脂抹粉，八方認真同情佢噃。
mailto:[email protected]