無綫近日於凌晨第5度重播91年的處境喜劇《卡拉屋企》，有大導演楚原處男下海，又有當年情侶檔吳鎮宇跟李婉華做鬥氣冤家，還有首隻電視狗明星Popeye粉墨登場，成為歷年處境劇一大突破。當然少不得周星馳御用編劇曾謹昌和《真情》編審陳寶華的故事創作，既瘋狂又溫馨的橋段，與一眾幕前幕後湊合起來產生的化學作用，足以令《卡拉屋企》成為觀眾至愛。

《卡拉屋企》成功背後，其實有不少鮮為人知故事，究竟，Popeye如何「演活」牠沙皮狗角色？
身為主角的婉華與鎮宇，為何「被消失」超過50集？
大導演楚原為何肯貢獻出他第一次？
《卡拉屋企》如何踏上瘋狂之路？
還有《衝上雲霄》的Sam哥，原來最先在《卡拉屋企》出現？

今日就由婉華與《卡拉屋企》監製梁家樹和導演鍾澍佳親自為大家拆解。

Popeye是鎮宇飼養的沙皮狗女，當年鎮宇為拍《卡拉屋企》期間可以照顧Popeye，所以索性帶牠一起到清水灣無綫電視城開工。《卡拉屋企》導演鍾澍佳日前接受《蘋果》專訪時說：「其實最早係Popeye自己走咗入鏡，所以就拍埋佢啦。拍咗幾個禮拜之後，有個編審走嚟問鎮宇Popeye識做啲乜？鎮宇話：『Popeye識做乜嘢呀，唔通識唱歌跳舞咩？』個編審想寫集戲由Popeye做主角，所以Popeye就成為一個好重要角色。」

鍾澍佳還透露有關於Popeye的小故事：「Popeye會講嘢呢個概念（《POPEYE夢驚魂》），喺嗰時嚟講係好新，《寶貝小豬嘜》動物會講嘢好似係95年，但我哋係91年，對我哋嚟講係一個冇任何idea嘅挑戰，所以我哋拍嘅時候，係要用好多好多真實嘅拍攝技巧，令到Popeye可以做到嗰啲動作，其實最重要一樣嘢係雞，因為Popeye好鍾意食雞，所以我哋要Popeye走埋嚟呢隻杯度聞一聞舐一舐隻杯，跟住舐一吓之後跟住走，咁我哋要喺隻杯搽滿晒雞油，令到佢過到嚟會聞會舐，但佢一舐嘅時候，我哋需要鎮宇喺另一方喝佢一聲Popeye，佢跟住會好驚，擰轉頭走，咁佢就會做到呢個戲嘅反應。其實Popeye好多鏡頭我哋係冇經剪接一take過，佢自己做到晒。嗰時又唔興花絮，如果有花絮，你會見到晒吳鎮宇喺個廠度跑來跑去，去唔同嘅地方嗌佢。」

眾多角色中，鍾澍佳最喜歡Popeye：「Popeye唔會駁你嘴吖嘛，其實佢哋每一個都好好。大家好有默契去做嗰件事，因為每一個演員都好專業，大家都唔衰得，唔可以忍唔住笑，唔可以NG，所以佢哋會諗盡辦法去完成場戲。」為此，《卡拉屋企》大部份鏡頭都是一take過完成，個個皆大歡喜可以早收工。

提到《卡拉屋企》越拍越瘋狂，鍾澍佳指10多集開始已有轉變：「好似第3個禮拜，有集戲講戒煙，而家戒煙嘅戲都冇得拍啦，因為煙仔嘅嘢唔可能喺而家電視劇出現，嗰集戲其實寫得好mad comedy，講一個人為咗戒煙可以去到幾盡。肥仔德（秦煌）同泰臣表哥（鎮宇）兩個夜晚瞓唔着出嚟打包煙，同包煙過唔去，已經有mad comedy嘅成份，啲瘋狂喜劇喺外國好受歡迎。曾謹昌發覺戒煙呢集成功之後，有一集全家人扮晒飛機師，扮余慕蓮男朋友，延展落嚟呢種風格。」有份扮機師的鎮宇，也就變成若干年後《衝上雲霄》的Sam哥。

鍾澍佳續說：「好似80集之後轉咗潘嘉德監製，潘嘉德係一個喺喜劇方面好強嘅監製，所以之後喜劇成份越嚟越誇張。嗰陣時好多人趕住返屋企睇《卡拉屋企》，你就會覺得原來呢個劇種對於香港人嚟講係一個驚喜嚟㗎喎。」

鍾澍佳指《卡拉屋企》令他學識喜劇方程式，對他後來監製的《難兄難弟》有重大影響和幫助：「大笑之後嘅溫情，笑中有淚嘅處理方式，《難兄難弟》都係用呢個方向去處理。我好記得《卡拉屋企》有集講拜山，啲仔女唔肯去拜山，白頭佬（楚原）激到爆血管，搞完一輪仔女終於肯去拜山，一家和好去拜，然之後白頭佬發覺幾十年嚟拜錯山，件事幾好笑，但又好溫馨，重點唔係拜邊個墳頭，重點係一家人一齊。」

「準時8點半喺度睇電視嘅人係少咗，但如果你個劇好睇，係一樣好多人睇，一樣可以形成好大口碑，但而家個盤唔係全部側重晒喺家庭觀眾嘅電視收視率上邊，我覺得而家嘅香港係更加需要一個好嘅處境喜劇喺度，去畀觀眾生活得好啲、開心啲，因為而家大家嘅生活壓力，面對嘅嘢、嘈吵嘢太多啦，我哋嗰時每日返屋企8點半笑半粒鐘，嗰晚會瞓得好啲，或者嗰日返工俾老細鬧完之後，起碼嗰晚有半個鐘頭你唔使理呢啲嘢，release吓自己，我覺得我哋香港人而家係需要。」

移居加拿大溫哥華多年的人妻李婉華，日前接受《蘋果》電話訪問，直指《卡拉屋企》是她最喜愛的電視作品，當年有幾集由Popeye擔任主角，她曾找來自己的愛犬客串：「有好多集戲都係Popeye做主角，佢都要有friend，所以搵咗我隻聖班納狗同佢做friend一齊拍戲囉，好好笑㗎。」

《卡拉屋企》尾段有近50集，鎮宇跟婉華完全「被消失」，直至尾聲，劇情才安排二人由外國返港現身。對此婉華解釋說：「點解我中途出咗嚟呢，我依稀記得嗰時同公司傾緊約，可能大家仲未傾得好好啦，所以佢哋就暫停咗我工作。之後我又拍咗啲劇集先至離開TVB嘅。」鎮宇日前接受《蘋果》訪問時，亦承認跟無綫續約出現問題而被調走。

還有大導演楚原，何以肯飾演白頭佬這個一家之主角色？《卡拉屋企》監製梁家樹日前電話訪問中說：「以前我成日同佢打麻雀，好熟，佢個人好好玩，好玩到你唔信，當年我拍處境喜劇，要搵啲演員搭落去，要有新鮮感同有喜劇天份嘅人，楚原叔係一個好好玩嘅人，好適合佢做。」就這樣，楚原叔由梁家樹麻雀腳變成了電視演員。

採訪:戴彩煥
攝影:仇志中
攝錄:廖達燊

《蘋果動新聞》訂閱新世代，4月開始免費訂閱，現在接受登記！
http://bit.ly/2Ja3IXw
-----------------------------
《動腦Q》周末主題夜
追加星期六、日 9:30 pm
星期一至五 10:30 pm
Day Day Q the money!
https://hk.adai.ly/veCxssynnV