45歲嘅綠葉王戴耀明，喺無綫捱足廿幾年，雖然佢曾經喺《鐵馬尋橋》嘅排長一角，同埋喺《巾幗梟雄之義海豪情》飾演嘅日本皇軍向山達也而受到觀眾注意，不過之後嘅角色偏向諧星為主，似乎幫唔到喺事業再有新衝擊；好彩，皇天不負有心人，小明獲睇中擔正做大陸劇《爆裂老婆三歲夫》嘅男一，出入有保姆車兼私人助手照顧，獲尊稱為「戴老師」，唔少網民都戥佢開心！

除咗《爆裂老婆》，聽講小明喺11月又會北上開工，將會同曹查理合作拍一套時裝網劇。

講到「升呢」做男一，小明話：「搵餐晏仔啫，都係一份工作，叫做賺多少少外快。其實今次真係機緣巧合，要多謝韋家雄介紹我俾老闆識。」

「最初佢哋同我講，我都以為係講笑，但係最後都返咗去拍幾日。去到橫店開工，又識咗另一班人，傾吓玩吓佢哋又俾咗另一個劇本俾我，叫我幫幫手，我初初仲以為係啲卑微角色，點知一睇係男一，真係嚇咗我一跳！」

小明自爆當時都忍唔住反問對方「你哋真係信得我過？」佢又話：「成個感覺真係好開心，得償所願，乜都試吓！」

獨自出門，話冇問題，就真係呃人嘅，自嘲係鄉下仔出城嘅小明坦言：「初初上去都唔係好慣，好似夜晚收工，如果喺香港成日都會一齊食飯，但係大陸演員啱啱相反，如果唔熟就返酒店，變咗好多時行街食飯都係自己一個人，所以都有lonely嘅時候！不過搵錢嘅感覺就OK。大前提係搵錢，惟有死頂，好彩上多幾次慣咗。」

採訪：何慧斯
場地：RedMR 紅人派對@皇室堡