劉嘉玲最近喺北京拍緊徐克導演嘅《狄仁傑之四大天王》，對手係趙又廷、林更新同馮紹峰等，早幾日甘國亮去北京探班，到夜晚收工，嘉玲仲請佢同老徐一齊去食日本菜。

而噚日一大早嘉玲又約咗幾個朋友去咗萬里長城行山，身穿白色T恤同米黃色褲，頭戴白色鴨嘴帽，揹住個大背囊，戴住墨超全副武裝上陣，行完之後，佢仲將照片放上微博。

頭先打俾嘉玲，問佢係咪唔使開工，咁得閒去行長城？佢話：「係呀！噚日同班朋友約埋去咗長城爬山，我平時喺香港都有行山，而長城係我一直想去爬山嘅地方，所以趁今次嚟北京拍戲，咁啱噚日我唔使開，咪約咗朋友去長城，我哋主要喺古北水鎮嗰邊行，叫司馬台長城，過咗我哋終點嘅嗰個門，外面的就係金山嶺長城，呢段冇乜人，所以朋友帶我行呢邊。」

問嘉玲行長城同香港行山有乜唔同？佢話：「感覺真係好唔同，人企喺咁偉大嘅長城遙望中國大地，人都特別精神爽利，將來有機會我都想再嚟長城爬山。」