李八方online︱梁振英又打倒昨日的我 屈民主黨誤導被fact check鞭屍
去留議會李八方online
立會延任問題近來成為城中熱話,鍾意得閒無事就衝出嚟刷存在感嘅梁振英689,之前亦都喺FB發表過意見,仲話「支持泛民總辭」㖭。民主黨之後引用佢呢番言論設計宣傳單張,點知689噚日竟然喺FB出咗個「嚴正聲明」,話單張指佢「最想民主派走」係嚴重誤導,佢其實最想民主派留任繼續履行職責,因為佢覺得人大的決定「完全合憲合法」咁話喎。專門Fact-check唔同FB post嘅專頁「求驗傳媒」隨即出咗個post大力鞭689屍,仲話呢番言論其實連藍媒「港人講地」都有引用過,結果惹嚟大批網民嘅強烈恥笑!
689出完個「嚴正聲明」之後,Facebook專頁「求驗傳媒」就將「昨日嘅佢」拎返出嚟鞭屍,搵返佢8月7號講「支持泛民總辭」嘅帖文,又攞埋「港人講地」引用佢言論嘅一個Po出嚟證實佢「真係有講過」,仲暗串689話都唔排除佢可能喺呢個幾月間改變咗心意嘅。其實喺網絡上「凡是走過都必留下痕跡」,點解鍾意玩Facebook嘅689會失算㗎?!
「我根本唔係搞政治嘅材料」、「N屆都唔選特首」、「唔會送仔女去外國讀書」……其實689已經唔係第一次「今日的我打倒昨日的我」㗎喇,除咗以上呢啲言論之外,佢1989年嗰陣仲出聲明深切哀悼北京嘅同胞㖭,真係「689信得過,777都會認錯」呀。不過其實689又無講錯嘅,佢果然唔係搞政治嘅材料,竟然靜靜雞跣向來撐政府嘅「港人講地」一鑊,真係無眼睇!好彩我哋之前無引用689呢番言論咋,如果唔係好鍾意屈《蘋果》「作新聞」嘅佢,一定又捉住嚟大造文章,八方逃過一劫!
FB專頁「求驗傳媒」連埋證據出咗篇文,反駁689對民主黨嘅「嚴正聲明」。互聯網
-----------------------------
-----------------------------