五年情俾官司緋聞考起
周汶錡戀杜德偉有壓力
蘋果日報 2003/07/18 00:00
名模周汶錡與杜德偉拍拖五年，感情本來都很穩定，但早前杜德偉藏毒被捕後，周汶錡便與吳耀漢兒子吳嘉龍傳緋聞，與杜德偉的感情似乎有變，她早前更表示拍拖頗有壓力。
周汶錡入行至今，除杜德偉外，只與吳嘉龍傳過緋聞，即引來連串風波，她激動地說：「根本係一件好小嘅事，行內人會知道係宣傳，行外人會點睇？我真係唔係好慣面對，我唔係藝人，因為同佢（吳嘉龍）一齊拍廣告就咁，將來我嘅故事咪重要涉及好多男人？對我好唔公平。」
至於男友杜德偉被判藏毒罪成，他沒有致電周汶錡，她又在西班牙巴塞隆拿旅行，令人猜測二人感情有變，對此她淡然地說：「我哋冇嘢喎！Alex（杜德偉）有打畀我，不過記者快啲啫。我唔會怪佢，因為佢可能要安慰媽咪先到我啦，好多嘢我哋心裏明白，唔係要擺喺口。」
問周汶錡為何不高調澄清？她說：「唔係話要拉住男友，拖住、舉起手俾人影相先叫支持。我哋根本唔當係一件好大嘅事，又唔係殺人放火，唔通單case要打兩年，我就要苦晒面咁兩年？至於去旅行，單case排期我哋控制唔到，唔通唔安排生活，玩都冇自由？」
周汶錡續說：「我哋拍拖唔止三、四年，可能都有啲老夫老妻啦，好正常啫。不過，我以前唔覺得拍拖有壓力，近期就開始有，我會試吓接受同適應。」
周汶錡在普通家庭長大，父親做小生意，母親是傳統的家庭主婦，周汶錡與妹妹周麗淇卻活在水銀燈下，她說：「我哋都喺傳統家庭長大，從來冇諗過我同妹妹會入娛樂圈，模特兒都屬於半個娛樂圈啦，不過佢哋幾民主，從來冇煩我哋。媽咪煲湯無敵㗎！佢好似一本湯水字典咁，補乜嘢、要飲乜嘢湯都知。」
周汶錡續說：「我係大家姐，媽咪經常會提醒我要照顧細佬妹，我哋感情好好，就算長大咗，妹妹遇到問題都會問我意見。」問她可有考慮像妹妹周麗淇般拍電影？她說：「我好鍾意𠵱家嘅工作，靚靚哋，又好自由，有時見到細妹成日病，一拍戲就唔停得，又冇假放，太辛苦喇。對我嚟講，自由感覺重要啲！」
採訪：林妙萍
攝影：林德雄
場地提供：帝苑酒店
媽咪好似一本湯水字典！
周汶錡表示會盡量適應感情帶來的壓力。
周汶錡：我同細妹周麗淇（左）感情好好！
杜德偉被判藏毒罪成時，周汶錡正在西班牙度假。 資料圖片
吳嘉龍和周汶錡因拍廣告而傳戀聞。 資料圖片