王氏港建私有化單嘢又有新發展，今次輪到大股東出招嘞，叫啲散戶快啲走貨，講到股價會冧梗咁，大有一拍兩散嘅味道。
華華禮拜一講過，「股壇長毛」港交所董事DavidWebb炮轟，話王氏港建私有化每股作價1.65元太搵笨，合理估值應係3.45元，佢仲話至少揸咗3.16%股權，夠晒飛玩寸個party，就算對方擺和頭酒都要每股2.5元先有得傾。
王氏港建今鋪曲線私有化九成九夢碎，主席王忠桐噚日搞咗個傳媒飯局，華華初時以為係講供股或配股，攤薄Webb哥嘅權益，實情佢冇呢個打算。王主席話，做生意講信用，每股作價1.65元一定唔會提高，總之6月28號股東會投票一決勝負。但佢一反常態咁呼籲小股東，既然股價仍高企1.6元，不妨趁現水平沽貨，雖則少過私有化作價幾仙，但起碼有斬獲。
王主席誓神劈願咁話，公司上市十幾年股價長期喺6毫子徘徊，皆因自己從來冇做莊家，市場又唔理工業股，既然成交量咁奀，掛牌盞嘥錢。舊年8月首次提私有化，最終差104萬股過唔到75%小股東贊成嘅門檻而飲恨，股價跌番未炒上時嘅約1蚊水位。

今鋪抄電盈買斷SUNDAY資產後將SUNDAY除牌條橋，點知港交所收緊咗條例，維持番一成票數否決就拜拜，Webb哥相信可得逞。
王忠桐放風話，今年首四個月收入下跌，逼近04、05年水平，中期業績公佈後股價實冧，力勸趁早獲利好過。佢又好風騷咁估，Webb哥可能喺1.5元入貨，先至阻頭阻勢，即使私有化過唔到，佢亦會打好呢份工，唔會賣盤。
提到囝囝王賢誌退出娛樂圈返嚟王氏港建幫手，佢老懷安慰咁話，阿仔打理啱啱投資咗成千萬嘅中醫保健藥品業務，希望五年內可分拆上市。
有行家婉轉問佢有冇擔心囝囝成家立室，佢話仔大仔世界，總之阿仔做生意都有排學，但人工肯定好過TVB嗰萬零蚊底薪。
[email protected]