一年一度嘅毅行者變成香港大型籌款盛事，其他等錢使機構發現原來善長除咗出錢，仲鍾意出力，同類型活動越搞越多，香港防癌會聯同童軍總會港島地域及香港海港扶輪社，3月30號舉行慈善步行，籌款資助經濟困難嘅癌症病人接受昂貴嘅藥物治療。

上年曾亁塘數月

呢個活動過去10年由童軍舉辦，防癌會則係第二年加入，期望可以籌得逾百萬元嘅善款，防癌會主席高永文向八方講，籌得款項會撥入「助醫計劃」，每名合資格嘅癌症病人，最多可獲資助18,000蚊，06年2月至今已經有超過830名病人受惠，撥出善款逾千萬元。
防癌會係非牟利機構，計劃資金全部靠捐款收入，上年一度亁塘而要暫停資助幾個月，有病人要停止治療。除咗助醫計劃，防癌會正將南塱醫院改為癌症康復中心，為癌症病人提供唔同嘅治療支援服務，預計6月正式投入服務，除咗有高永文坐鎮，仲請到醫管局東區醫院前行政總監梁明娟做義務總監，想出力捐款嘅，可瀏覽防癌會網頁，或致電28140950查詢。