近三次田戰分別有「同得福」、「智有心得」及「平湖之星」在今季打叠贏完再贏，三駒無獨有偶都係剛造出全場最快末段時間，證明季初階段此類衝得勁之新勝馬可放心追捧。

今日（8日）沙田賽事又有「贏盡」、「大籐王」及「五十五十」三駒剛交出最快末段時間掄元，其中第六場三班1600米之「大籐王」，上仗開鑼日（3日）尾場角逐1400米，雖然走外叠，但入直路仍能如入無人之境勝出，似乎轉四歲後成熟更進一步，既然上季三歲已在1600米贏馬，今仗轉跑此程，當然有份量。

其他締速出色馬為第四場五班1200米草地賽的「神寳金剛」，上仗季內復出角逐谷草五班1200米，拉士一段衝最快的22秒07，由落後極多追至只輸兩身位，較同晚同程三班賽衝得最勁之「紅星」只差百分之一秒。今仗立即由賴維銘換上柏寶，出王牌報番以往一戰即勝之五班田草1200米，種種動態顯示有乘勇求補中之決心。