【新增內容、圖片】

第29屆金曲獎今晚將於台北小巨蛋舉行，曾經兩奪台灣金曲歌王嘅陳奕迅(Eason)，今年以《C'mon in～》專輯第9度入圍，今晚將會角逐最佳國語男歌手及最佳國語專輯獎兩個大獎，單挑林俊傑（JJ）、許書豪、宋念宇、李玖哲爭歌王；歌后方面，就由張惠妹、彭佳慧、徐佳瑩、飛和呂薔爭奪，唔知阿妹可唔可以4度稱后！

今年金曲獎搵咗蕭敬騰擔任司儀，雖然紅地毯喺5點先開始，但係唔少fans下午3點左右已經喺度擺定位支持偶像，有「雨神」之稱嘅蕭敬騰，未到場已經落雨，果然名不虛傳。不過蕭敬騰亦不負所望，佢著住GUCCI 2018秋冬系列，不過西裝裡面乜都冇著，deep V大晒排骨胸！

蕭敬騰笑稱今次唔係佢嘅最大尺度，之前喺演唱會都試過著透視裝，佢仲笑笑口話：「今天過完比較好呼吸，昨天睡5個小時，有睡到就不錯，目前都不擔心。」外界嘅焦點，除咗係Eason同JJ究竟邊個會第3度稱王之外，神隱咗半年嘅張惠妹會唔會現身，阿妹嘅經理人接受台灣《蘋果》詢問，佢話：「目前應該是會的。」

結果喺千呼萬喚嘅情況下，神隱咗半年天后阿妹，同外甥女安那一齊現身，之前阿妹多次被傳媒影到身型爆脹，不過今次見到阿妹，明顯消瘦咗好多！之後阿妹接受訪問話，平時佢一個人行紅毯嘅話，自己會好隨意，不過為安那喺佢身邊，所以要照顧佢。見到阿妹消瘦咗，於是問佢瘦咗幾多？點知佢走去摸住男記者嘅胸膛話：「我閉關的時候，一直有瘦，你也是！」佢仲話雖然頒獎禮未開始，但係要有氣勢，所以希望拎晒所有獎！

精選娛聞，喺晒《娛果》
http://fb.com/appledailyent