城大前校長張信剛退休後北上，輪流喺北大、清華做客席教授，平日甚少返香港，近日卻為咗一班靚女重臨舊地，唔係有桃色瓜葛要執手尾，而係做選美評判，今勻奉旨昅女。
由鳳凰衞視舉辦嘅2007年中華小姐環球大賽聽晚舉行總決賽，據講呢次係張校長「處男」任選美評判，因為朋友盛情邀請，佢唔好意思托手踭惟有應承，其他評判仲有導演關錦鵬、馮小剛等。
張信剛做咗11年城大校長，雖然已經退休但仍然好眷戀城大，搬離加多利山校長府後，畀市值租金租住城大高級教職員宿舍，同舊同事做鄰居。城大新校長遴選本應今個月有結果，但至今未見公佈。