世界上，有一種惡，就叫發窮惡。

話說，星美（198）出事就大家都知！作為大債主之一嘅電視廣播（511）（TVB），今次就真係中巨伏！之前買落星美（198）兩筆總值1.06 億美元（約8.27億港元）高息債，半年唔夠星美就有機會要違約。

好啦，TVB方面，就話首期利息袋袋平安；但之後本金收唔收得返，就真係未知之數。

不過，星期一嗰日，有傳媒獨家報道，TVB諗住做「白武士」出手救星美，仲大讚星美盈利能力，引消息人士話「星美真係一個千載難逢的機會」、「對電視廣播而言，星美財困，是機不是危。」呢位消息人士一段賣花讚花香既Sales式說話一出街，TVB就要出通告，循個例寫「正對星美的財務狀况作初步審查」。

表面證供睇，你就當然以為，TVB好似真係對星美流晒口水啦。不過都有消息人士就話，呢單新聞出咗之後，TVB內部真係當堂嚇一跳，佢哋根本唔敢買亦唔想買，「依家即係咩呀？單方面放料，焗TVB上轎呀？送埋大床畀你好唔好？」。

講真，星美旗下約320家影院，有140間停業，依家中環中心辦公室，據悉已人去樓空，公司欠薪、欠租及欠版權費，夾夾埋埋近5億，呢度都仲未計債券。TVB又未做過院綫，點會就咁「嘩！好抵呀！入市！」咁就衝入場？如果TVB最後真係做「白武士」，股價會點？大家估都估到啦！

話分兩頭，星美大股東覃輝潛水多時，但最近成個中環都收到風，佢同TVB非執董盧永仁經常碰面密密斟，斟啲咩？斷估唔係講緊《大帥哥》劇情啩？

by千頌C@堆填區
http://fb.com/winbigwok