甄子丹今日喺跑馬地出席「2018賽馬香港打吡大賽獲選參賽馬匹名單公佈會」，子丹已經第6年擔任打吡大使，太太汪詩詩仲拍咗段片，叫子丹扮個攞到打吡賽大獎嘅表情，子丹笑言太太係CEO，佢話：「我會keep住個獎盃，其他贏嘅都俾晒太太。」子丹仲話如果俾佢喺馬圈工作，佢會選擇做騎師，因為騎師同做演員嘅心態一樣，付出多時嘅努力，最後係為咗取得好嘅成績，而子丹話無論對工作或家庭，都追求過程，全力以赴。

提到太太點解要子丹展露攞獎時嘅表情？佢笑話：「可能我喺佢面前永遠都係yes man，佢想睇我唔喺佢面前嘅表情，不過都應該係yes man。」問到白色情人節，子丹就好肉麻話：「我哋日日都係情人節，我哋聚少離多，一齊嘅時候盡量珍惜嗰個時刻，我嘅心放晒喺拍電影，有時覺得未夠好，未係最好嘅丈夫同父親。」

子丹仲爆平時都係由太太製造驚喜，呢方面自己要再努力。不過喺任何大小日子，子丹都會送花畀老婆製造浪漫，一年十幾次咁多，佢仲笑言花店做佢嘅生意會好開心。咁太太仲有冇投訴子丹唔夠浪漫？佢話：「一個好愛你嘅女士永遠都有投訴嘅，老夫老妻冇咗激情，就唔會投訴。」問到想唔想太太多啲投訴？子丹即話：「夠嘞，依家啱啱好承受到，唔使再多。」

精選娛聞，喺晒《娛果》
http://fb.com/appledailyent