前妻伊能靜上內地節目成日講以前嘅感情事，早前上湖北衛視節目《綱到你身邊》，又再講自己同庾澄慶(哈林)離婚後，佢同現任老公秦昊嘅戀愛過程，反而，前夫庾澄慶比較有風度，甚少在人前講起伊能靜，不過，唔少fans都擔心哈林嘅感情會唔會太dry!

現年53歲嘅哈林噚日上主持人張小燕嘅錄製節目，被問感情近況，哈林直言目前仲係單身，據哈林嘅好友爆料稱，適合哈林嘅伴侶除咗孝順、善良之外，仲要愛運動、重視環保等，更透露哈林已自定擇偶年齡去到55歲，即係年齡大兩年都冇問題。

而一向同哈林好老友嘅張小燕，一齊做主持《超級星期天》長達9年，佢就大爆，當年哈林喺廠內好挑剔，張小燕表示：「工作人員必須趴在他旁邊不斷讚美說服他。」張小燕又講，哈林對音樂細節嘅堅持，亦令在場工作人員好頭痛，哈林都承認自己係比較難搞。