發展商賣樓前，點都唔少得整個示範單位畀買家睇辦，喺大陸都唔例外，有啲重靚過香港㖭。
蘭西啱啱去上海靜安區，參觀靜安楓景。示範單位，單係售樓處就落唔少本，兩層高，採用大量落地玻璃，內有三個示範單位，分別有兩房嘅1130方呎、三房1399呎同複式2476呎。搭建費高達五百幾萬元（人民幣，下同），以最平單位八十幾萬計，可以買到六七個。
聽講示範單位出自新加坡設計名師手筆，由用料到設計都一絲不苟，甚有睇頭。書房放咗部電腦，不斷重複介紹個盤嘅資料，買家可以現實虛擬一齊睇。示範單位家具全部隨樓附送，已經唔似以前咁畀清水房人，設計品味完全唔老套，單係洗手盆（圖二右），前衞又實用。睇嚟香港要加把勁，畀人趕上先嚟改進就遲啦！
兆安苑租金回報和味
銀行減息減到差不多冇咁滯，物業投資要有高回報又唔係咁易。最近係中原屯門分行話，區內居屋兆安苑（圖三）有單位租金回報率有近11.5厘，喺住宅嚟講真係極之高。
個單位係D座低層五室，面積591方呎，成交價47萬，呎價795蚊，低市價逾一成，買家係投資者。中原話單位以七成按揭，二十年還款，息率2.5厘計，月供都係1743蚊，但目前市場租值成四千五蚊，回報有成11.5厘。
不過，蘭西查過資料，兆安苑C座一個591呎中層單位，9月時全包月租都係二千九蚊，若果上述單位租到呢個價，回報率都有7.4厘，總好過擺喺銀行乾蒸。
深圳睇樓免費搭直通車
泛海集團有份投資嘅羅湖東門東悅名軒，月底會喺香港發售，個盤市值七億，唔少嘢㗎。泛海執行董事關堡林話，個盤提供八百多個單位，面積由380餘至960呎，以細單位為主。售價唔貴，迎合港人，租金回報理想，而且承租能力又強。
另外，位於深圳皇崗口岸嘅皇御苑，禮拜日舉辦「金秋嘉年華」，有歌唱同魔術表演、兒童遊戲比賽，重有抽獎同免費自助餐食，最重要係有免費直通巴士接送，唔使錢就可以玩足一日。
港府救市發展商又唔制
特區政府真係左右做人難，好似早排唔少發展商高呼政府要出手救樓市，阿董就應要求準備推出新一輪救市措施，幫吓佢哋。點知近排發展商又話，應讓市場自由調節喎！咁即係想點！
太古主席何禮泰噚日喺美商會午宴後話，唔贊成政府干預樓市，認為樓市應自由調節，勾地制度亦行之有效，應該繼續實行。前日長實執行董事吳佳慶都話，唔贊成政府停止一切土地供應嘅方式嚟穩定樓市，之前恒隆主席陳啟宗都有類似嘅言論。