當年今日
關於我們

【老婆有戲癮】郭可盈睇啱劇本有機復出 林文龍:幫佢推咗

蘋果日報 2016/10/02 20:34

楊怡羅仲謙結婚郭可盈林文龍

羅仲謙同楊怡今日結成夫婦,仲喺香港麗思卡爾頓酒店筳開52席招呼親友,唔少圈中人都有到賀,包括林文龍郭可盈夫婦、胡杏兒同老公李乘德(Philip)、王君馨、姚瑩瑩、林夏薇同老公莫贊生、范振鋒夫婦、楊秀惠,仲有曾經傳過緋聞嘅蔡思貝同溫家偉等。
其中郭可盈被問到近來有冇睇大台重播佢有份演出嘅經典劇《創世紀》,郭可盈話:「有呀,間中都有睇,自己都好回味當時嘅情景,因為都拍咗一年。」問佢有冇戲癮?佢坦承有,再問到有冇其他電視台有接觸過佢?郭可盈話:「有時都會收到一啲大陸嘅劇本,不過都要睇時間,配唔配合到先至得,因為個女而家讀緊小一,要睇時間。」
郭可盈指「TVB冇接觸過我」,但林就補充:「其實TVB有接觸過我o架,不過幫佢推咗。」郭可盈就話:「如果有好劇本同吸引嘅角色,我都會把持不住。」