專媾有錢女

33歲馬貫東，喺大台劇中多數飾演乖仔、暖男角色，幾有觀眾緣，所以近年亦有上位跡象，開始躋身男二之列。

不過，今日有報導指佢其實係「軟飯王」，專搵有錢女拍拖，前度Queenie Kwok係，現任Christy So都係，二人更準備築愛巢同居。

前度包辦所有使費

據報有讀者向《蘋果》爆料，指馬貫東前度Queenie Kwok係英國大學畢業返港，二人經朋友介紹認識並相戀。Queenie屋企做海鮮批發，老竇仲疑似係政協身份。

拍拖期間，Queenie幾乎包起晒馬貫東所有使費，唔單只衫褲鞋襪出街飯錢，就連卡數，以至去旅行坐business、住酒店，通通都係Queenie埋單。

有傳馬貫東家境一般，喺大台捱足13年，曾經窮到戶口只剩幾蚊存款，所以搵到個有米又肯使喺佢身上嘅女友，執到。但，馬貫東難得近年氹得掂大台高層，有上位機會，所以拍拖事收得好埋，仲千叮萬囑Queenie唔可以公開關係，就連Queenie約好晒《開心速遞》一班藝員幫馬貫東慶祝生日，事後Queenie post出小鳥依「馬」合照，但馬貫東post嘅相就無女友Queenie份。

至於二人最後分手，《蘋果》報導指係去年中嘅事，因為女方父母反對。

否認現任係富家女

馬貫東現任女友係Christy So，馬貫東亦直認二人開始拍拖無耐，但就否認女方係有錢女。不過，從Christy客廳大過一般港人成間屋嘅相嚟睇，唔嘢少，難怪咁快就有本事傳同居。

雖然馬貫東貫徹戀情低調做法，IG一張女友嘅相都無，但就充斥住唔少貓貓相。而Christy So亦是愛貓之人，只要認一認貓，就會發現二人關係匪淺。唔知係咪同樣受到馬貫東叮囑唔好公關戀情，Christy嘅IG一樣無二人合照，但唔難發現，Christy嘅相片、留言中，周不時都會使用「馬」嘅圖案，係個幾明示嘅暗示。

順帶一提，聽聞馬貫東女友Christy嘅前度，就係《反黑路人甲》入面嘅陸秋朱敏瀚。喺電視城返工，撞見「好兄弟」嘅機率唔細。

----------------------------

守住新聞自由 和你撐計劃每月$300起撐《壹》仔

按此了解更多

壹呼百應 號召有心人 請香港人睇壹週刊

按此了解更多

-----------------------------

英國移民、升學、就業、買樓生活資訊！

立即加入「走佬去英國 － BNO 5+1 移民資訊研究所 」

-----------------------------

【《壹週刊》昔日紙本檔案庫】

30年壹仔經典 壹壹重現！