《2016國際太太總決賽》噚晚喺佐敦舉行，羅霖連續第五屆做評委，佢著住件火紅色連身中門大開嘅晚裝華麗登場，姍姍來遲嘅佢話：「遲咗出來，出門口發現血壓低，暈一暈，如果下世我一定要做男人，要做一個盡責，錫老婆，有內涵，錫身邊所有朋友嘅男人，華仔(劉德華)就係一個好好嘅對象，大仔升大學三年級，今(噚)日要送大仔走，大仔喺美國西雅圖讀書，二仔喺洛杉磯，之前都有諗過陪仔開學，不過時差真係唔適應，所以近年只係送機。」

羅霖話香港有人搵佢拍劇，不過佢要考慮下：「考慮下自己體力，對上一次都20年前拍《真情》，結婚之後拍過一套，當時有人遷就，唔駛捱通宵，o依家要調校自己身體，係一個大挑戰，媽咪叫我補吓身先。」講到上次一班美魔女吳婉芳、李嘉欣飯局，佢話：「嗰次係一個飯局，個個都咁靚，好羨慕，朋友交流美魔女，個個咁靚，咁有動力。」