早喺7月時，小弟分析過騰訊、阿里收入增長嘅極限情況，呢一刻重新計算一次。阿里加上騰訊截至最新季度嘅一年收入係4,123.65億人仔，除以4G用戶數字9.67億名4G用戶，即每年每名內地4G手機用戶平均負擔426.4人仔嘅騰訊阿里收入，相當於2016年中國城鎮人均可支配收入33,616元嘅1.27%，上述數字已盡用公開資訊，算式不完全準確但絕對具參考價值。1.27%睇落數字好細，但講緊騰訊、阿里2017年市盈率48至50倍，大概已經反映到中國網民每100蚊有差唔多3蚊落喺騰訊、阿里個袋度。

呢兩間公司係透過服務去賺取收入，而每個人份人工有限，要食要住要買衫要搭車等等一連串駛費，所以駛喺騰訊、阿里身上嘅錢，始終會有個盡頭，每100蚊畀騰訊阿里三幾蚊應該接近極限，即使假設兩者壟斷千秋萬世，再打後兩間公司國內市場收入仍難以大幅度拋離國民收入增幅。長遠股價仍有上升空間，但可見將來單靠內地收入，要佢出現以幾何級股價升幅，應該冇乜可能。

長遠騰訊增長有乜出路？嚿年騰訊成功入股Supercell逾八成股權，可以提供海外收入，另一個大家覺得唔起眼嘅交易，就係入股Snapchat母公司12%股權。需知道騰訊要成為Snap大股東，人哋未必肯賣之餘，染紅亦分分鐘令個個唔用Snapchat，於是小試牛刀最實際。不過，當時消息一出，Snap股價先升後跌，大家似乎對交易不厚寄望。毫無疑問，海外市場將會係騰訊最大樽頸位，倚賴收購去滲入海外市場一着，路途絕不平坦，Snapchat同Supercell以至其他潛在收購能否產生1+1=無限的效應，就係騰訊長遠關鍵嘅劇情。

晉佳

https://www.facebook.com/advanceguy1/