在電影《起底組》中飾演兩姊妹嘅鄧麗欣（Stephy）同陳凱琳（Grace），喺戲中性格極端，飾演警察嘅Stephy正氣凜然，Grace就係現實拜金女。故事講述灣仔解款車馬路跌錢案，飾演警察嘅Stephy同「高登仔」游學修為案件鬥快搵線索破案。

Stephy指今次對佢嚟講係親情片，着重於姊妹之情，有別於過往嘅愛情片，Stephy喺戲中同Grace都幾多爭吵戲份，佢話：「Grace真係好瘦，我盡可能唔企佢旁邊，企喺佢後面可以顯得我瘦啲。」Stephy講笑話喺爭吵時會推Grace，但身體像紙般薄嘅Grace隨即彈後兩呎遠，擔心對方會骨折。Stephy透露，難忘Grace喺第一日合作就講粗口，Stephy話：「因為我哋第一場就拍鬧交戲，佢突然爆粗，我都呆一呆嚇親，直至拍完該鏡頭，我問番佢係唔係講粗口，原來係導演預先叫佢講，刻意唔話我知，等我有預計唔到嘅反應，俾我一個下馬威。」

Stephy指導演薛可正都係著名嘅高登仔，Stephy話：「我以前好怕網上討論，特別入行初期，抨擊說話總係好多，唯有訓練自己唔睇。」Stephy表示，網民嘅「起底」能力同團體精神比傳媒更利害，Stephy笑言「高登仔」都有叻仔，不單是一般嘅宅男。

Grace首次拍電影之餘，又演繹新角色，佢表示知道會演呢套戲之後，心情一直好緊張，Grace話：「電影得短短兩小時，要交代導演想講嘅故事。」Grace指故事描寫兩姊妹嘅關係，Grace話：「描述我哋喺愛與恨之間，好激氣對方，但永遠唔會嬲對方好耐，好貼地寫實，演出上要讓觀眾感受到我哋嘅姊妹情，自覺真係唔易。」對於導演要求Grace喺對白上加插粗口，Grace笑言：「導演要求我爆粗，我問佢想我講幾多隻字嘅粗口，佢問我可以講到幾多，我話不如試吓講一個字先。」

精選娛聞，喺晒《娛果》
http://fb.com/appledailyent