同一陣營，唔一定有面要畀！前排八方同大家講過，星島集團旗下嘅《巴士的報》解構咗佢哋老闆、即係何柱國點解喺公開場合向阿董開拖，原來係因為老董搞智庫又搞網媒《香港頭條》，令炒何大動肝火！

查實各有各做唔得咩？有時可能因為「唔怕生壞命，最怕改壞名」。阿董個網媒即使人氣唔高，但弊在個名同炒何嘅免費報章《頭條日報》極相似，《巴士的報》今日又有專欄文章「爆料」，話炒何發火後，阿董嘅《香港頭條》已經靜靜雞改咗名變成《點知天下》。

雖然阿董已經讓咗步，但似乎未平息到炒何嘅怒火，事關《巴士的報》引述「高人」話喎，阿董肯改名只係「好過唔做嘢」，但「更好的是不要再搞媒體」，理由係阿董嘅智庫靠籌錢而運作，籌錢即係人哋嘅錢，搞媒體就係「偏離本業」喎！

明明阿董係政協副主席、位屬國家領導人級別，而炒何只係政協常委咋噃......似乎真正嘅影響力，同各人喺國家嘅位置，未必成正比。