皇馬前鋒C朗今夏重返曼聯嘅消息，越吹就越似，勢估唔到連曼聯舊將菲臘尼維利都參與埋一份；日前佢就喺個人Twitter轉載C朗轉會曼聯消息嘅新聞，仲留言：「Welcome home」（歡迎回家），唔通佢收到內幕料，知道C朗真係回巢？雖然菲臘仔之後澄清，話自己只係講笑，不過都起碼吸引紅魔鬼球迷興奮咗一陣。

菲臘仔同C朗喺2003至2005年喺曼聯合作過，兩人仲一齊贏04年英足盃，不過2005年後菲臘仔就轉投愛華頓，所以宜家收曼聯風，都唔知仲準唔準。