雖然距離特首選舉仲有成兩年時間，但隨住各路人馬陸續蒲頭試水溫，選戰真係越嚟越好睇，單睇各路有心人對勢必爭取連任嘅特首梁振英點樣單單打打，已經值回票價。有花生友就話，其實政界中人對CY嘅變臉，好值得大家留意，坊間盛傳唔少因為利益先投身「梁粉」陣營嘅政界中人開始有離心，唔少人都同CY保持距離，明哲保身。

轉軚係長遠投資

而喺評估CY選情之餘，唔少花生友話下屆特首選舉必睇亮點，係有冇2017年版新世界仔？事關新世界揸FIT人鄭家純喺梁振英當選後，迅速由唐營跳去梁營，結果獲得「新世界仔」美名，係褒係貶？大家心知肚明。當時惹起政圈極大漣漪，成為茶餘飯後一時佳話。
查實唔少政界中人都話，呢吓轉軚唔嘢小，少啲勇氣都好難做到，純官嗰一鋪真係意外地「好嘢」㗎。有政界花生友就話喎，企出嚟轉軚撐梁振英係高風險行動，獲封新世界仔，點可以浪得虛名？近日嘅星光大道割讓海濱風波，證明有時有啲嘢，未必一時有成果；但只要長遠投資有道，霎時冇咗面子又何妨？
花生友聽聞，就連梁粉陣營中都有人話呢單嘢若然冇公開招標，會惹嚟官商勾結之嫌，點起一個政治炸彈，值得咩？康文署最終話要就星光大道擴建重新諮詢，到底係基於公眾壓力定係以免影響梁振英連任？花生友都好想知。

花生友
周二、四刊出