【FAN享會足本版】KOLOR答應歌迷齊上齊落:支持吓本地嘢
KolorFAN享會
由《蘋果》舉辦的「KOLOR搖滾FAN享會」上周五(8月30日)舉行,KOLOR四位成員主音及結他手Sammy、鼓手Michael、結他手Robin、Bass手Sing落力演出Rock爆蘋果大樓,場內氣氛持續高溫,KOLOR由《生於憂患》、《天地會》一直唱到《愚公》、《初老》、《獨家堅料》、《七尺之下》等共10首歌,樂迷無時無刻保持High爆情緒,完全無冷場。
Sammy唱《獨家堅料》時,說這首歌當年是想唱給傳媒聽,但之後又叫大家不要深究歌詞,結他手Robin則補充:「呢首歌收錄喺第一張唱片,當年我哋啱啱出嚟唔識死,以為1000隻應該ok,但而家仲有幾箱喺度,所以想買可以搵我哋。」
唱電影「不義之戰」主題曲《七尺之下》時,Sammy再爆:「當年諗得好理想,就係部戲一上有隻主題曲,點知主題曲出咗兩年部戲都未上。」然後KOLOR成員又一唱一和,當提到此片導演是前無綫監製李志倫(Jacky),Sing笑說:「之前好似唔畀得人知,但而家佢都俾人炒咗,應該唔驚啦!」
其間,Sammy透露明年已有幾個計劃,包括會再舉行演唱會,叫樂迷要多點支持本地創作,「支持吓本地嘢,因為我哋都冇乜機會去外地喇!」即有樂迷高呼:「唔好返大陸呀!」Sammy聞言便笑着回應:「唔返喇!」全場再次拍掌歡呼,叫KOLOR不要放棄香港。
最後,KOLOR安排以一曲《時差》作為Encore部份最後一首歌,惟四子離台後,樂迷企足10分鐘仍不肯離場,瘋狂大嗌Encore及「釋放KOLOR」,最後更接力高叫「光復香港 時代革命」口號,KOLOR四子最終被樂迷熱情感動,出場表示要跟樂迷齊上齊落,然後清唱一曲《友誼之光》,再分批和樂迷影合照,成功安撫樂迷和平散去。
-----------------------------
【撐學生】
召集有心人 撐學生全年睇《蘋果》
立即按此