周國賢（Endy）、方皓玟同Shine今日出席商場聖誕活動，Endy嚟緊12號就舉行音樂會，最近都忙於排練，之前因為演唱會嘅網絡售票有問題，有粉絲排咗幾個鐘隊都買唔到飛，Endy話好過意唔去，佢今日就宣佈好消息：「終於排除萬難，決定喺明年加兩場，同一個地點，日子遲啲公佈，感激大家咁錫我，遲啲希望搵大啲場報答大家。」至於講到之前有粉絲投訴叱咤網絡投票「我最喜愛男歌手」唔見Endy個名，所以投唔到票畀佢，Endy就笑言要自我檢討，佢話：「今年犯咗電腦問題，我係尊重機制，今年作品比較少，focus番明年。」

至於方皓玟今晚就會同老公飛日本旅行兼散心，順便為明年嘅作品攞靈感，提到入圍叱咤「我最喜愛女歌手」五強，問到有冇信心？佢話：「唯一係用開心輕鬆嘅心情去玩，呢個係一個時間畀所有人鼓勵一吓呢一個年嘅努力，除咗祝自己好彩，希望每位歌手都good luck。」

更多娛聞，喺晒《娛果》
http://fb.com/appledailyent