全職媽媽嘅人工值幾多錢？根據Salary.com嘅調查發現，由於家庭主婦身兼多職，要做管家、託兒所老師、廚師、洗衫工人、電腦操作員、設備管理員、司機、心理學家、行政總裁等工作，如果每項職務都有人工，年薪應該有13.8萬美元（約107.6萬港元，即月薪8.7萬港元），引起網民議論紛紛。

身兼多職斷件計

SteveA-Austin喺《MSNBC討論區》批評：「呢項調查涉及性別歧視，因為淨係識得稱讚家庭主婦有好大貢獻，而唔讚吓啲全職爸爸。」
JonOlson講笑話：「如果做全職媽媽真係值十幾萬美元年薪，我寧願辭咗份工，返屋企湊仔，但唔知老公肯唔肯出咁多糧畀我？」
調查顯示，全職媽媽平均每周做92個鐘（每日超過13個鐘），比一般美國人每星期返工40小時，多咗52個鐘，所以呢52小時應該當加班，獲得1倍半薪金；假設時薪大約22.5美元，咁一年就有13.8萬美元。
SteveA-Austin話：「呢項調查誇大咗家庭主婦應得嘅報酬，因為一般美國打工仔如果有6美金時薪，已經偷笑；就算時薪有10美元，全職媽媽嘅年薪應該只得6.14萬美元。」
Elasmy就認為：「部份男人由於妒忌，所以認為家庭主婦嘅工作唔值13.8萬美元年薪。事實上，做家頭細務仲辛苦過喺公司打工。」