熱爆全城嘅路姆西，已經成為港人示威活動嘅神獸，噚日八方朝早途經政府總部，又見到路姆西晨早出動啦，佢同成班「市民」叫口號示威。但睇真啲，咦，乜路姆西整咗容咩？唔同咗樣嘅？再行近啲，A貨嚟㗎喎，個身只係由紅白藍膠袋組成、狼頭亦做得唔似。示威示得咁是是但但？哦，原來只係警方搵臨記拍戲「演習」，作日後訓練之用咋。
首場政改早餐會噚日朝早喺政總內舉行之時，總部閘外卻有近20名「示威者」高舉巨型「路姆西」抗議，要求政府收信同會見市民，更喺鐵馬掛起「釋放許志永」、「抗議選擇性檢控，製造白色恐怖」橫額，幾名警員在場維持秩序，防止「示威者」推倒鐵馬。

警臨記拍戲「演習」

八方初初以為，邊個團體咁識把握時機到場贈「㷫」？但睇睇吓唔對路，不單警員狀甚輕鬆、同平時紮晒馬唔同，連個路姆西亦走晒樣，個身係紅白藍膠袋製成、狼頭亦唔神似，身上仲貼住「路福西」三隻字，種種迹象顯示，事有蹊蹺。
再行過啲就發現，有個牌寫住「警察拍攝中」。原來呢批「示威者」全部都係警方請返嚟嘅臨記，當中有人仲扮攝影記者，另有工作人員拍攝呢次模擬示威短片，供警方日後內部訓練用。

八方同行家趁機影低呢幕珍貴「劇照」，點知幫警察拍攝嘅攝影人員一度話片段唔能夠公開，仲要求刪相同片㖭！講得出呢個要求嘅「拍攝人員」，係咪以為自己係城管定公安呀？八方梗係唔理，政總外係公開地方，人人有權影相，反駁返佢哋唔想公開可以匿埋拍，呢位人員先至知衰彈開。唔知呢一幕「真實片段」，工作人員又有冇影低呢？

mailto:[email protected]