年初，港府為顧全中央的面子，大開邊境，任由武肺攻港。之後不肯吸取教訓，連續四波爆發均源自檢疫漏洞，卻辯解豁免檢疫安排有必要、須確保貨品供應不會中斷，難以完全封關。直至理工大學醫療科技及資訊學系副教授蕭傑恒做疫情「吹哨者」， 靠他的病毒基因分析， 踢爆第三波根源，食衞局長陳肇始才肯認衰，收緊邊境措施。但他慨嘆，一年過去，政府在統籌病毒分析工作上仍然落後，「其實對付新型傳染病，基因分析係不可或缺一環」。

1月底武漢肺炎輸入本港，12日後出現首宗本地個案。專長愛滋病病毒及結核病研究的蕭傑恒，沒多久就把注意力放到武肺病毒，並於4月發表第一波疫情的病毒基因數據，揭露輸入個案把武漢的主流病毒株帶入本港後，在社區擴散的過程，並形成「打邊爐」、「福慧精舍」等群組。3月中開始第二波疫情時，他也協助醫管局研究樣本，確認病毒源於海外留學生把歐洲主流病毒株帶回來。

7月中第三波開始，他就懷疑社區的病毒株已經變異，進而揭發原來出自同期的哈薩克機組人員、菲律賓海員等輸入個案，證明豁免檢疫制度有漏洞。他表示，起初覺得這些關聯並不特別，因為對上兩波疫情，也是由輸入個案引爆本地疫情，預料之內，「其實睇輸入個案來自邊度、邊班機，已經可以知個大概」；但傳媒報道後，原來連一向口硬的政府也急「轉軚」，方感到自己的工作「真係幫到社會斬到第三波來源」。

但他也詫異，掌握出入境及檢測第一手數據的政府，原來對邊境有何漏洞懵然不知，「因為基因分析係滯後嘅工作，出現個案之後搵返樣本做分析，有結果再拼湊同比對，已經係一兩個星期之後嘅事⋯⋯當初醫護罷工要求封關，作為healthcare worker嚟講，動機一定冇錯。」

更讓蕭傑恒惋惜的是，政府始終沒有加快病毒基因分析工作，遑論統籌資源，讓學者、研究人員協助病毒追蹤。「早喺第一、二波嗰陣，世界各地學者都爭住做基因分析，將圖譜放晒上網，但香港嚟嚟去去係得幾位學者做，袁國勇教授、杜啟泓教授、Leo Poon（潘烈文）教授，佢哋會拎得比較多樣本做。」他續說：「但喺7月之前，其實冇人知我哋做緊呢樣嘢，我都要每日（下午）430聽完記者會，估吓邊個病人可能喺邊間醫院，打去問吓可唔可以畀個樣本做研究。呢啲來回程序最麻煩，成個過程一至兩星期，驗病毒基因反而1日左右搞掂⋯⋯要做好基因分析，有個案之後兩至三日做晒就最好，同要做得夠廣泛、多群組，你先見到個趨勢，而唔係散收收。」

上月，蕭傑恒的研究又證實了第四波的病毒株，早在9月尾已從尼泊爾輸入個案出現，亦即之後「歌舞群組」患者身上找到的GR型病毒株。他慨嘆，政府在武肺爆發之初，沒有統籌資源做好病毒分析，一次又一次錯失遏止爆發的時機；來到年尾仍無改善，只能寄望政府來年投放資源，「做好統籌，將所有學者嘅成果，拼組成大拼圖，追返落後。」

在曾經是烽火之地的理大做研究，別是一番滋味。蕭傑恒受訪時多次感謝團隊成員，為揭露疫情真相，一起在實驗室熬過千百個夜晚，「佢哋真係好辛苦，過去一年受到好多不必要嘅污名、指摘，甚至仲會有人WhatsApp鬧理大嘅學生。好多學生OT做嘢，佢哋冇額外錢收，往往冇回報，但大家都想為香港出一分力，我非常感謝佢哋。」

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！