近年淡出幕前嘅馮寶寶，早幾年一度出現異行，前年仲公開承認自己患上抑鬱症，不過前幾日關仁喺上環撞見佢同結婚六年嘅大馬籍老公翁兆全拍拖探病兼食飯，見佢心情大好，笑容滿面，相信佢嘅病況都應該大有好轉。

幸福掃背

嗰晚七點零鐘，52歲嘅馮寶寶以一身運動look打扮，同丈夫翁生、一對中年朋友企正喺皇后大道中嘅行人路邊，當時四個人一齊望天，指手劃腳有講有笑，關仁都忍唔住向眾人視線方向望去，但除咗個天同幾嚿雲之外，就乜都睇唔到，偏偏佢哋又對住個天望唔停喎，睇足幾分鐘至捨得走，再行去上環嘅東華醫院。
由皇后大道中踩上醫院須時約15分鐘，馮寶寶平日應該有做運動，上斜都冇氣喘，但畢竟近年養尊處優，比以前確有發福，現出雙下巴同肚腩，身形亦脹卜卜、圓碌碌。
馮寶寶等四人直上醫院嘅外科部後，就探望一名瞓喺病床嘅老婆婆，見馮寶寶神情都有啲憂心。個半鐘後，佢哋探病完已經天色轉黑，馮寶寶離場落斜時，仲同老公挽手而行，談笑風生，又向老公體貼掃背，認真恩愛，之後再同埋同行友人去上環兩興潮州海鮮飯店，歎潮州菜醫肚。