韓國男團JYJ成員朴有天近日捲入涉性侵案，而涉案受害人更多達4名。朴有天所屬事務所就強烈否認，表示要起訴對方誣告及恐嚇。今日朴有天嘅代表律師就前往警局遞交告狀，起訴首名報案嘅24歲李姓女子誣告及恐嚇。據知，對方曾勒索朴有天10億韓圜（約670萬港元）。

起訴書嘅內容透露李姓女子曾攜男友及堂哥跟朴有天方面見面，李姓女子曾提出金錢要求，故朴有天方面決定起訴李姓女子、其男友及堂哥誣告同恐嚇罪。

其中韓媒《ChannelA》更率先公開訴狀內容，李姓女子曾表示：「因為受到侵犯，冇辦法繼續喺韓國生活，要去中國，因此畀10億韓圜（670萬港元）我。」而雙方討論後，金額降至約335萬港元，但最後似係談判失敗，於是李姓女子於本月10日報警指遭朴有天性侵。

朴有天方面正準備起訴第二、第三及第四名報案嘅女子誣告罪。

李姓女子於本月10日報警，指朴有天於本月4日於娛樂場所嘅廁所內性侵佢，但後嚟佢又於15日撤銷起訴，改口話唔係被迫，直至今日就被朴有天反起訴誣告及恐嚇。