何猷君今晚喺灣仔出席「演藝學院2017年度籌款舞宴」，佢會同李雲迪一齊表演鋼琴，緋聞女友奚夢瑤有嚟撐場，猷君喺開騷前接受訪問：「好緊張，平時彈流行曲，今次彈樂曲，冇諗過可以同世界級鋼琴家李雲迪一齊表演，直至今日綵排至夾過，呢個活動籌備咗多個月，之前有傾過會彈啲咩，最難唔在於彈，而係同李雲迪同台合作。」

平時有冇彈畀奚夢瑤聽？猷君即話：「今日唔答呢啲娛樂問題，家姐（超盈）喺今次活動嘅chairman，想用年輕人角度帶一份感染力。」猷君仲話媽咪梁安琪交咗多年學費俾子女學琴，終於有個細路真係彈到琴。

超盈同何厚華嘅囡囡何芓諄係今次活動主席，超盈就話猷君係今次小組委員會嘅主席，所以出一分力，令到更多人關注呢件事。猷君今次有份表演，但係何芓諄同何超盈就唔會表演。講到猷君緋聞女友奚夢瑤，超盈就話佢係一個鍾意藝術嘅人，問到超盈係唔係拉埋猷君同夢瑤，佢就話：「吓，咩啊，大家都係志趣相投。」

更多娛聞，喺晒《娛果》
http://fb.com/appledailyent