許志安噚晚喺港台《第37屆十大中文金曲頒獎音樂會》，奪得十優歌手及一首金曲獎，問到佢上次攞十優歌手獎，係相隔幾多年前嘅事？安仔就話：「都唔記得啦，咁耐，有就開心，冇就唔使唔開心。」

去年簽咗太陽娛樂後，樂壇成績大豐收？安仔話總算對黃柏高（Paco）有所交代：「仲記得簽約係去年1月1日，成績對佢哋嚟講已有交代，我平時個人懶懶哋，佢（Paco）就好勤力，15年希望自己唔好咁懶。」

問到鄭秀文（Sammi）覺得安仔係勤力定懶先？佢就話：「見仁見智啦﹗」再追問邊方面勤力邊方面懶？喺日頭勤力啲定夜晚勤力啲？安仔聞言都只係喺度笑，咁啱此時葉振棠喺後台影緊相，安仔趁機表示：「葉振棠喺度我哋正經啲，多謝葉振棠畀咗呢個答案我。」

至於係咪家庭生活好開心，故無心工作？佢話：「唔係，其實我覺得自己好勤力，好搏命，有嘢做就做，冇嘢做就去跑步，Paco每分每秒都努力緊。」

係咪家庭生活上勤力啲？佢話：「唔使咁急，呢啲嘢要用時間，唔似得工作，（工作）時間唔等人，不過我都好盡力（指家庭方面）。」咁相比之下Sammi懶啲？佢話：「不如講下我想講及讀者想知嘅嘢，我五月紅館開騷，商議咗開三面台。」

講到若有辣身舞演出，啱開四面台喎？安仔話：「可能三面台好睇，因為上一次三面台，已經係99年，想畀啲新鮮感自己同讀者。」

咁會唔會操到Sexybody？佢話：「操就一定，定咗時間畀自己，農曆新年後stop，唔可以放縱自己，因為新年啲嘢好好食，之後想跟小方（方力申）及杜德偉操﹗就算操唔到爆肌，都應該會好爆。」

咁係咪會弗過sammi？佢話：「梗係啦，男人最緊要有台型嘛﹗」屆時會否搵「老婆」上台？安仔話：「佢好似巡迴喎，做嘢緊要啲。（你係『老公』喎，老公緊要啲？）相信佢OK都會嚟。」

到時會唔會背住唱《唯獨你是不可取替》呀？佢笑言：「唔使面對面嘛，我有睇報紙0架。」之前Sammi開騷，唱咗安仔《一步一生》，咁安仔五月個騷，會唔會唱返Sammi啲歌？佢話：「睇下佢想我唱乜嘢囉，如果我唱得就唱。」