踏入2019年，盧巧音（Candy）的工作一浪接一浪，除了宣傳新歌、籌備5月演唱會，以及與老公KOLOR樂隊主音蘇浩才（Sammy）、野佬低音結他手 何兆基合組樂團The Fiveday外，近日她積極備戰練跑，參加明天（10日）在日本名古屋舉行的馬拉松。

首次參與全馬42公里馬拉松的Candy，早前在啟德接受《蘋果》訪問，跑齡只有兩年多的她，之前只參加過5公里和10公里賽，但從未參加過半馬和全馬，今次她飛往日本參賽，Candy既興奮又緊張，事關當地天氣只有10度以下，她說︰「我未試過咁凍跑，但香港呢兩年最凍嗰一日，我都試過去跑過，feel下自己頂唔頂得順。」

雖然她只有一個月時間做訓練和準備，不過她和老公Sammy自創一套「人體黃金戰衣」的訓練，她說︰「人哋會傍晚或者避太陽先跑，但我同蘇生鍾意喺夏天最猛太陽時去跑。如果只係天氣好去跑，當遇到天氣壞啲、曬啲，你又頂唔順，呢個training練咗唔怕夏天、落雨都跑得，當然除咗打風會有危險。」

備戰這個月，Candy每星期跑足6日，不論跑山、路跑，還是跑運動場，她認為各有特色，除了選擇適合自己跑的場地，還要投資在跑鞋上，她說︰「之前整親過好多地方，不能盡錄。我試過好多鞋，原來有啲鞋係唔適合自己，腳痛都要睇吓係邊度痛，因應（情況）而選擇適合嘅鞋，所以投資落鞋度都唔少。」她會聽取教練意見，如何為自己痛腳按摩，紓緩痛楚，Candy笑謂︰「有手有腳，冇病冇痛，可以跑步係好幸運嘅事。」

Candy開始做運動，全因老公Sammy影響，「佢隊band做運動先，跑步做gym，見佢哋做，我又開始做，我做運動嘅原因係因為哮喘，跑咗半年後我先戒煙。跑咗步之後，我冇吸過哮喘藥，亦唔使再覆診，咁好都唔做咩！」

曾患情緒病的Candy，坦言身心都好大改變，「以前諗嘢會鑽牛角尖，婚前直頭short，要睇精神科醫生，脾氣又唔好，影響工作。而家最大嘅得着，諗嘢正路咗，冇轉牛角尖，思路好清晰，身體又好咗，同埋做運動又唔需要花好多錢，得到嘅用錢都買唔到，點解唔去做。」

採訪︰羅婉玲
攝錄︰馮嘉銘
化妝︰Macy Chan
髮型︰Tommy Tom @ Xenter Salon
服裝︰New Balance

全港打工仔特約：Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2VKESPM

《Captain Marvel》完全導讀本
足料78頁 深度解構最強英雄！
https://bit.ly/2VyXIt2

第二屆最港電影大獎投票網址
https://bit.ly/thekongestfilmawards2018